పంజాబ్లో టిఫిన్ బాక్స్ బాంబుల వ్యవహారం కలకలం రేపుతోంది. సరిహద్దు రాష్ట్రమైన పంజాబ్లో ఈ తరహా ఘటనలు పెరుగుతుండటం వల్ల జాతీయ భద్రతపై ప్రశ్నలు తలెత్తుతున్నాయి. తాజాగా రాష్ట్రంలోని ఫిరోజ్పుర్ జిల్లాలో టిఫిన్ బాక్స్ బాంబు బయటపడటం రాజకీయ దుమారానికి దారితీసింది.
అసలేం జరిగింది?
దీపావళికి ఒక్క రోజుముందు, అంటే బుధవారం భారత్- పాకిస్థాన్ సరిహద్దులోని ఫిరోజ్పుర్లో టిఫిన్ బాక్స్ బాంబు బయటపడింది. అలి కే గ్రామంలోని ఓ వ్యవసాయ క్షేత్రంలో దీనిని పోలీసులు గుర్తించారు. తొలుత.. జలాలాబాద్ పేలుళ్ల కేసులో అరెస్ట్ అయిన ముగ్గురు నిందితుల నుంచి ఓ టిఫిన్ బాక్స్ బాంబు, పెన్డ్రైవ్ను స్వాధీనం చేసుకున్నారు పోలీసులు. వారిని విచారించగా.. మరో టిఫిన్ బాక్సు బాంబు.. అలి కే గ్రామంలో ఉన్నట్టు తెలుసుకుని అక్కడి వెళ్లి దానిని కూడా స్వాధీనం చేసుకున్నారు.
ఇది కొత్త కాదు!
సెప్టెంబర్లో జలాలాబాద్లోని పంజాబ్ నేషనల్ బ్యాంక్ సమీపంలో పేలుడు జరిగింది. ఈ ఘటనలో ఒకరు మృతిచెందారు. రంగంలోకి దిగిన పోలీసులు నిందితులను అదుపులోకి తీసుకున్నారు. ఆ తర్వాత అమృత్సర్, కపూర్తలా, ఫాజిల్కా, తర్న్ తరన్ ప్రాంతాల్లో గాలింపు చర్యలు చేపట్టి టిఫిన్ బాక్స్ బాంబులు స్వాధీనం చేసుకున్నారు.
అంతకుముందు.. అమృత్సర్ ప్రాంతంలో ఐఈడీతో కూడిన టిఫిన్ బాక్స్ బాంబును స్వాధీనం చేసుకుని భారీ ఉగ్ర కుట్రను భగ్నం చేశారు. టిఫిన్ బాక్స్లో 2-5కేజీల ఐఈడీ ఉందని, డ్రోన్లతో వాటిని పాకిస్థాన్ సరఫరా చేసి ఉంటుందని పోలీసులు అనుమానం వ్యక్తం చేశారు. స్వాతంత్ర్య దినోత్సవానికి కొన్ని రోజుల ముందు ఈ ఘటన వెలుగుచూడటం కలకలం రేపింది.
అమరీందర్ సింగ్ ఫైర్..
టిఫిన్ బాక్స్ బాంబుల వ్యవహారంపై మాజీ సీఎం, పంజాబ్ లోక్ కాంగ్రెస్ అధ్యక్షుడు అమరీందర్ సింగ్ స్పందించారు. వాస్తవాలను తోసిపుచ్చడం మానుకుని, ఈ వ్యవహారాన్ని తీవ్రంగా పరిగణించాలని రాష్ట్ర ప్రభుత్వానికి సూచించారు. సరిహద్దు వెంబడి ఇలాంటి ఘటనలు పెరిగిపోతున్నాయని, పంజాబ్ శాంతి భద్రతలను దృష్టిలో పెట్టుకుని అక్కడ భద్రతను పెంచాలని డిమాండ్ చేశారు.
గతంలోనూ అమరీందర్ ఇలాంటి వ్యాఖ్యలు చేశారు. అప్పుడు ప్రభుత్వం వాటిని తిప్పికొట్టింది. అమరీందర్ అనవసర వ్యాఖ్యలు చేసి ప్రజల్లో భయాన్ని పెంచుతున్నారని డిప్యూటీ సీఎం సుఖ్జిందర్ సింగ్ రంధావా అభిప్రాయపడ్డారు.
ఇవీ చూడండి:-
