ఉత్తర్ప్రదేశ్ ప్రయాగ్రాజ్లో గంగానది తీరాన దేవరఖ్ ఘాట్ వద్ద భారీ సంఖ్యలో మృతదేహాలను పాతిపెట్టిన ఘటన వెలుగుచూసింది. అయితే.. ఇవి కొవిడ్తో మృతి చెందినవారివా? కాదా? అనేదానిపై ఇంకా స్పష్టత లేదు. ఈ సమాధులపై కాషాయ వస్త్రం కప్పి ఉండటం గమనార్హం.
కరోనా బారినపడి ప్రాణాలు కోల్పోయే వారి సంఖ్య పెరుగుతుండగా.. మృతదేహాల అంత్యక్రియల నిర్వహణకు అయ్యే ఖర్చు కూడా పెరిగింది. దీంతో ఆర్థిక స్తోమతలేని వారు.. తమ బంధువుల మృతదేహాలను ఇలా గంగానది ఒడ్డున ఖననం చేసి వెళ్తున్నట్లు తెలుస్తోంది.
కొట్టుకొస్తూనే ఉన్న మృతదేహాలు..
మరోవైపు.. ఉత్తర్ప్రదేశ్లోని గంగానదిలో మృతదేహాలు కొట్టుకువస్తున్న ఘటనలు కొనసాగతూనే ఉన్నాయి. తాజాగా.. కన్నౌజ్ జిల్లాలోని మహాదేవి ఘాట్ వద్ద 50 మృతదేహాలు తేలియాడుతూ కనిపించటం కలకలం రేపింది. భారీ వర్షాల కారణంగా మృతదేహాలు నది ఒడ్డుకు వచ్చి చేరాయి.
మహాదేవి ఘాట్ వద్ద 'ఈటీవీ భారత్' తీసిన ఓ ఎక్స్క్లూజివ్ వీడియోలో.. నది ఒడ్డులో మృతదేహాన్ని పూడ్చే ప్రదేశం పక్కన పీపీఈ కిట్ ధరించిన ఓ వ్యక్తి నిల్చోవటం కనిపించింది. దీన్ని బట్టి కొవిడ్ మృతదేహాలనే వారు ఇలా ఖననం చేస్తున్నారనే అనుమానాలు వ్యక్తమవుతున్నాయి.
అధికారుల చర్యలు..
నెలరోజుల వ్యవధిలోనే మహాదేవి గంగా ఘాట్ వద్ద దాదాపు 2,000 మంది అంత్యక్రియలు నిర్వహించినట్లు సమాచారం. ఈ మృతదేహాల విషయం వార్తల్లోకి రావడం వల్ల అధికారులు చర్యలు చేపట్టారు. ఈ విషయంపై దర్యాప్తు చేసేందుకు కన్నౌజ్ జిల్లా అదనపు మేజిస్ట్రేట్ గజేంద్ర సింగ్.. ముగ్గురు సభ్యులతో కూడిన ఓ కమిటీని ఏర్పాటు చేశారు. దీనిపై మూడు రోజుల్లో నివేదిక ఇవ్వాలని ఆదేశించారు.
కన్నౌజ్ జిల్లా కంటే ముందు.. ఉత్తర్ప్రదేశ్లోని గాజీపుర్, ఉన్నావ్, చందౌలీ, కాన్పుర్, వారణాసి సహా ఇతర జిల్లాల్లో గంగానదిలో మృతదేహాలు లభ్యమయ్యాయి.
ఇదీ చూడండి: గంగానదిలో మృతదేహాల కట్టడికి పోలీసుల పహారా
ఇదీ చూడండి: గంగానది ఒడ్డున ఇసుకలో మృతదేహాల కలకలం
