బంగాల్ ముఖ్యమంత్రి మమతా బెనర్జీకి సవాలు విసిరింది భారతీయ జనతా పార్టీ (భాజపా). అసెంబ్లీ ఎన్నికల్లో కేవలం నందిగ్రామ్ నుంచే పోటీ చేస్తానని దీదీ ప్రకటించగలరా అని భాజపా జాతీయ కార్యదర్శి కైలాస్ విజయ వర్గీయ శనివారం ఛాలెంజ్ చేశారు.
"నందిగ్రామ్ నుంచి పోటీ చేస్తానని మమత బెనర్జీ చెప్పారు. గెలుపుపై విశ్వాసం ఉంటే మరో చోటు నుంచి బరిలో నిలవనని ఆమె ప్రకటించాలి. లేదంటే నందిగ్రామ్పై దీదీకి నమ్మకం లేనట్లే." అని వర్గీయ ట్వీట్ చేశారు.
టీఎంసీ కౌంటర్..
భాజపా సవాలును తిప్పికొట్టింది అధికార తృణమూల్ కాంగ్రెస్ పార్టీ (టీఎంసీ). "నందిగ్రామ్లో అభ్యర్థిని ప్రకటించడానికి భాజపా ఎందుకు భయపడుతోంది? ఇప్పటివరకూ ముఖ్యమంత్రి అభ్యర్థిని ఎందుకు ప్రకటించలేదు?" అని టీఎంసీ ప్రశ్నించింది.
కీలకమైన నందిగ్రామ్ నుంచి పోటీ చేస్తానని జనవరిలో మమత ప్రకటించారు. అయితే నందిగ్రామ్ అభ్యర్థిని ప్రకటించని భాజపా.. ముఖ్యమంత్రి ఎవరనేది అధికారంలోకి వచ్చాక నిర్ణయిస్తామని చెప్పింది.
ఇదీ చూడండి: 50 వేల ఓట్ల తేడాతో దీదీని ఓడిస్తా: సువేందు
ఇదీ చూడండి: డ్రగ్స్‌ కేసు చుట్టూ బంగాల్ రాజకీయాలు!
