థాయిలాండ్లో జరిగే కీలక సదస్సులకు హాజరయ్యేందుకు ప్రధాని నరేంద్రమోదీ.. ఈ రోజు ఉదయం బ్యాంకాక్ బయలుదేరారు. ఆసియాన్, తూర్పు ఆసియాతో పాటు ప్రాంతీయ సమగ్ర ఆర్థిక భాగస్వామ్య కూటమి(ఆర్సీఈపీ) సదస్సుల్లో మోదీ పాల్గొంటారు.
నవంబర్ 4న ఆర్సీఈపీ ఒప్పందం జరగనుంది. దీనిపై చర్చల్లో పాల్గొననున్న మోదీ.. కూటమిలో చేరే విషయంపై వస్తున్న ఊహాగానాలపై స్పష్టతనిచ్చారు. థాయిలాండ్ బయలుదేరే ముందు ఈ విషయంపై మాట్లాడారు.
"ఈ సదస్సులో భారత వాణిజ్యానికి సంబంధించి వస్తువులు, సేవలు, పెట్టుబడులు సంబంధించిన అన్నీ మనకు కేటాయిస్తేనే.. కూటమిలో చేరే విషయాన్ని పరిశీలిస్తాం. భారత్ తూర్పు విదేశాంగ విధానానికి కీలకంగా ఉన్న ఆర్సీఈపీపై ఆచితూచి వ్యవహరిస్తాం. "
-నరేంద్రమోదీ, ప్రధానమంత్రి
ఆసియా సదస్సుల్లో..
ఆసియాన్ సంబంధిత సదస్సులు భారత దౌత్య వ్యవహారాల్లో కీలకమైనవని మోదీ అన్నారు. ఆసియాన్తో భాగస్వామ్యంలో సమాచార వ్యవస్థ, సామర్థ్య పెంపు, వాణిజ్యం, సాంస్కృతిక భాగస్వామ్యం మూలస్తంభాల్లాంటివని తెలిపారు.
తూర్పు ఆసియా సదస్సు(ఈఏఎస్).. ప్రాంతీయ సహకార నిర్మాణంలో ఇటీవల కీలకంగా మారిందని మోదీ గుర్తుచేశారు. ఇందులో ముఖ్యమైన దేశాలు భాగం పంచుకున్నాయన్నారు.
'సావాస్దీ మోదీ' కార్యక్రమం
బ్యాంకాక్కు చేరుకున్న అనంతరం మోదీకి థాయిలాండ్లోని భారతీయులు స్వాగతం పలకనున్నారు. అక్కడి భారతీయులు శనివారం సాయంత్రం నిర్వహించే 'సావాస్దీ మోదీ' కార్యక్రమానికి హాజరవనున్నట్లు తెలిపారు ప్రధాని. థాయిలాండ్ అభివృద్ధికి భారత సంతతి వ్యక్తులు, ఎన్ఆర్ఐలు ఎంతో కృషి చేశారని తెలిపారు.
ఇదీ చూడండి : చైనావ్యాప్తంగా 5జీ సేవలు షురూ- భారత్లో ఎప్పుడో?
