ఉత్తరప్రదేశ్లో రాజకీయం వేడెక్కుతోంది. ప్రియాంక గాంధీ పర్యటన సందర్భంగా భాజాపా-కాంగ్రెస్ మధ్య విమర్శల పర్వం కొనసాగుతోంది. ఉత్తరప్రదేశ్లో ఎక్కువ కాలం అధికారంలో ఉన్న కాంగ్రెస్ రాష్ట్రానికేమీ చేయలేదని యూపీ ముఖ్యమంత్రి యోగీ ఆదిత్యనాథ్ విమర్శించారు.
భాజపా నాయకుల విమర్శలను ప్రియాంక గాంధీ ఖండించారు. అభివృద్ధిపై నివేదికలు విడుదల చేయటం కాదు. క్షేత్రస్థాయికి వచ్చి చూస్తే వాస్తవాలేంటో తెలుస్తాయని ఎద్దేవా చేశారు ప్రియాంక గాంధీ.
70 ఏళ్ల పాలనలో కాంగ్రెస్ ఏమీ చేయలేదన్న భాజపా విమర్శలను ప్రియాంక తిప్పికొట్టారు. గతాన్ని వదిలేసి ఐదేళ్ల పాలనలో ముందు మీరేం చేశారో చెప్పాలని డిమాండ్ చేశారు.
" నివేదికలు చూడటానికి, ప్రచారానికి బాగానే ఉంటాయి. క్షేత్రస్థాయికి వచ్చి చూడండి, అన్నీ సమస్యలే కనిపిస్తున్నాయి. నేను ప్రతిరోజు ప్రజలను కలుస్తున్నా... రైతులు, జవాన్లు, విద్యార్థులు, అంగన్వాడీ, ఆశా వర్కర్లు ఇలా ఎవరిని కలిసినా సమస్యలే వినిపిస్తున్నాయి. కొన్ని చోట్ల అంగన్వాడీ ఉద్యోగులకు రూ.17 వేల జీతం ఇస్తామని ప్రభుత్వం హామీ ఇచ్చింది. కానీ గడిచిన రెండేళ్లుగా వారికి 8 వేల రూపాయలే ఇస్తున్నారు. 70 ఏళ్లు కాంగ్రెస్ ఏం చేసింది..? అనే చర్చకు ముగింపు పలకాలి. ఐదేళ్ల అధికారంలో మీరేం చేశారో? చెప్పండి"
- ప్రియాంక గాంధీ, కాంగ్రెస్ ప్రధాన కార్యదర్శి
ఉత్తరప్రదేశ్లో యోగి ఆదిత్యానాథ్ నేతృత్వంలో రెండేళ్ల పాలన పూర్తయిన సందర్భంగా రాష్ట్రంలో జరిగిన అభివృద్ధిపై నివేదికలు విడుదల చేసింది ప్రభుత్వం. ఈ సందర్భంగా దేశానికి స్వాతంత్రం వచ్చినప్పటి నుంచి ఎక్కువ కాలం అధికారంలో ఉన్న కాంగ్రెస్ రాష్ట్రానికి ఏమీ చేయలేదని సీఎం ఆదిత్యనాథ్ విమర్శించారు.
