పరాక్రమ్​ కాదు.. దేశ్​నాయక్​ దివస్​ ఇది: దీదీ

నేతాజీ సుభాష్​ చంద్రబోస్​ జయంతిని కేంద్ర ప్రభుత్వం ఇంతకుముందు ఏనాడు జరపలేదని బంగాల్​ ముఖ్యమంత్రి మమతాబెనర్జీ విమర్శించారు. పరాక్రమ్​ దివస్​ పేరుతో బోస్ జయంతి​ వేడుకలను కేంద్రం ఇప్పుడు నిర్వహించడం ఏంటని ప్రశ్నించారు.

నేతాజీ సుభాష్​ చంద్ర బోస్​ జయంతిని దేశ్​నాయక్​ దివస్​గా తాము జరుపుకుంటున్నామని బంగాల్​ ముఖ్యమంత్రి మమతా బెనర్జీ తెలిపారు. నేతాజీని దేశ్​నాయక్​ అని రవీంద్రనాథ్​ ఠాగూర్​ పిలిచేవారని అన్నారు. పరాక్రమ్​ ఏంటని మమతా ఎద్దేవా చేశారు. స్వాతంత్య్ర సమర యోధుడు నేతాజీ సుభాష్ చంద్రబోస్ 125 వ జయంతి సందర్భంగా బంగాల్​లో భారీ ర్యాలీ నిర్వహించిన మమతా ఈ వ్యాఖ్యలు చేశారు. శ్యామ్​ బజార్​ నుంచి రెడ్​ రోడ్​ వరకు వేలాది మంది వెంట రాగా 6 కిలోమీటర్ల పాదయాత్ర చేపట్టారు.

"జాతీయ ఆర్మీని సుభాష్​చంద్రబోస్​ ఏర్పాటు చేసినప్పుడు.. గుజరాత్​, బంగాల్​, తమిళనాడులోని ఎంతో మందిని భాగస్వాములను చేశారు. విభజించు-పాలించు విధానానికి వ్యతిరేకంగా ఆయన పోరాడారు. ఇంతకుముందు ఏనాడు నేతాజీ జయంతిని కేంద్ర ప్రభుత్వం జరపలేదు."

-- మమతా బెనర్జీ, బంగాల్​ ముఖ్యమంత్రి.

నేతాజీ స్మారక చిహ్నాన్ని తాము నిర్మిస్తామని మమత తెలిపారు. దేశంలో నాలుగు రాజధానులు ఉండాలని ఆమె అభిప్రాయపడ్డారు. ఇంతటి విశాల దేశంలో ఒకే రాజధాని ఎందుకు ఉండాలని ప్రశ్నించారు. ప్లానింగ్ కమిషన్​ తిరిగి ఏర్పాటు చేసి... నీతి ఆయోగ్​, కమిషన్​ సంయుక్తంగా పనిచేసేలా చూడాలని అన్నారు. ప్లానింగ్​ కమిషన్​ను రద్దు చేయడం సమంజసం కాదని మోదీ ప్రభుత్వంపై మండిపడ్డారు.

ఇదీ చదవండి:నేతాజీ జయంతి: బంగాల్​లో దీదీ భారీ ర్యాలీ