బిహార్ ఎన్నికల సమరంలో తొలి దశ పోలింగ్కు సర్వం సిద్ధమైంది. కరోనా సంక్షోభంలో జరుగుతున్న తొలి ఎన్నిక ఇదే కావడం వల్ల బిహార్వైపు దేశ ప్రజలు ఆసక్తిగా చూస్తున్నారు. మొదటి దశలో భాగంగా 71స్థానాలకు బుధవారం ఓటింగ్ జరగనుంది. 2.14కోట్ల మంది ఓటర్లు 1,066 మంది అభ్యర్థుల భవితవ్యాన్ని ఈవీఎంలలో నిక్షిప్తం చేయనున్నారు.
కరోనా నుంచి రక్షణ...
కరోనా నేపథ్యంలో ఎన్నికల సంఘం విస్తృత చర్యలు చేపట్టింది. పోలింగ్ కేంద్రాల శానిటైజేషన్ నుంచి ఎన్నికల సిబ్బందికి పీపీఈ కిట్ల పంపిణీ వరకు అన్ని జాగ్రత్తలు తీసుకుంది. మాస్కు ధరించడం తప్పనిసరి చేసింది.
పార్టీలు- స్థానాలు..
71 స్థానాల్లో ముఖ్యమంత్రి నితీశ్ కుమార్ నేతృత్వంలోని జేడీయూ 35 స్థానాలు, మిత్రపక్షం భాజపా 29 స్థానాల్లో బరిలోకి దిగాయి. మహాకూటమి సర్దుబాట్లలో భాగంగా ఆర్జేడీ 42, కాంగ్రెస్ 20 చోట్ల పోటీపడుతున్నాయి. చిరాగ్ పాసవాన్ అధ్యక్షతన ఎల్జేపీ 41 అసెంబ్లీ స్థానాల్లో బరిలోకి దిగింది. ముఖ్యంగా జేడీయూ పోటీ చేస్తున్న 35స్థానాల్లో గెలుపే లక్ష్యంగా తమ అభ్యర్థులను రంగంలోకి దింపింది.
ఇదీ చూడండి:- బిహార్ బరి: నితీశ్ పీఠం నిలిచేనా- ఓటరు ఎవరివైపు?
ప్రముఖులు..
ప్రస్తుత ప్రభుత్వంలోని కేబినెట్ మంత్రులైన ప్రేమ్ కుమార్(గయా టౌన్), విజయ్ కుమార్ సిన్హా(లఖిసరై), రామ్ నారాయణ్ మండల్(బంక), కృష్ణానందన్ ప్రసాద్ వర్మ(జెహానాబాద్), జైకుమార్ సింగ్(దినార), సంతోష్ కుమార్ నిరాలా(రాజ్పుర్) ఈ దఫా ఎన్నికల్లో తమ అదృష్టాన్ని పరీక్షించుకుంటున్నారు.
కొత్తగా..
కామన్వెల్త్ గేమ్స్లో షూటింగ్లో బంగారు పతాకాన్ని దక్కించుకున్న 27ఏళ్ల శ్రేయాసి సింగ్ ఈ ఎన్నికలతో రాజకీయ రంగప్రవేశం చేస్తున్నారు. భాజపా టికెట్ మీద జముయి నియోజకవర్గం నుంచి ఎన్నికల బరిలో నిలిచారు. ఆర్జేడీకి చెందిన సిట్టింగ్ ఎమ్మెల్యే, కేంద్ర మాజీ మంత్రి జయప్రకాశ్ నారాయణ్ యాదవ్ తనయుడు విజయ్ ప్రకాశ్ యాదవ్పై పోటీకి దిగారు.
మరోవైపు జయప్రకాశ్ నారాయణ్ కుమార్తె కూడా తొలిసారిగా ఎన్నికల్లో పోటీ చేస్తున్నారు. 28ఏళ్ల దివ్య ప్రకాశ్.. ఆర్జేడీ టికెట్ మీద తారాపుర్ నియోజకవర్గం నుంచి ఎన్నికల బరిలోకి దిగారు.
అయితే గయా జిల్లాలోని ఇమామ్గంజ్లో ఎన్నికల పోరు హోరాహోరీగా సాగుతుందని అంచనా. మాజీ ముఖ్యమంత్రి, సిట్టింగ్ ఎమ్మెల్యే జితన్ రామ్ మాంజీ ఎన్డీఏ అభ్యర్థిగా పోటీ చేస్తుండగా.. అదే నియోజకవర్గంలో 2015వరకు సేవలందించిన ఉదయ్ నారాయణ్ చౌదరిని రంగంలోకి దింపింది ఆర్జేడీ. జేడీయూను వీడి కొన్నేళ్ల క్రితమే ఆర్జేడీ తీర్థం పుచ్చుకున్నారు ఉదయ్.
ఇదీ చూడండి- బిహార్ బరి: 'నిరుద్యోగి'పైనే అందరి గురి
