కేంద్ర మంత్రి రామ్విలాస్ పాసవాన్ మృతి పట్ల రాష్ట్రపతి రామ్నాథ్ కోవింద్ సంతాపం వ్యక్తం చేశారు. పాసవాన్ అణగారిన వర్గాల తరఫున పోరాడారని కీర్తించారు.
"కేంద్ర మంత్రి రామ్విలాస పాసవాన్ మరణంతో దేశం.. దూరదృష్టి గల నాయకుడిని కోల్పోయింది. ఆయన చాలా చురుకైన నేత. దీర్ఘకాలం పార్లమెంటు సభ్యుడిగా కొనసాగారు. అణగారిన వర్గాల గొంతుకగా ఉన్నారు. వారికోసం పోరాడారు.
యువతలో ఆయన ఓ సోషలిస్ట్ ఫైర్బ్రాండ్. ఎమర్జెన్సీ వ్యతిరేక ఉద్యమంలో జయప్రకాష్ నారాయణ్ వంటి మహానేతల అడుగుజాడల్లో నడిచారు. ప్రజలకు అండగా ఉన్నారు. వారి సంక్షేమం కోసం కృషి చేశారు. ఆయన కుటుంబానికి, మద్దతుదారులకు సంతాపాన్ని తెలియజేస్తున్నా."
- రామ్నాథ్ కోవింద్, రాష్ట్రపతి
దేశానికి తీరని లోటు..
పాసవాన్ మరణం దేశానికి తీరని లోటు అని ప్రధాని నరేంద్రమోదీ తెలిపారు.
"పాసవాన్ మరణవార్త విని దిగ్భ్రాంతి చెందా. దేశ రాజకీయాల్లో ఆయన స్థానాన్ని ఎప్పటికీ పూడ్చలేం. ఆయన మృతి నాకు వ్యక్తిగతంగా తీరని లోటు. స్నేహితుడు, విలువైన సహచరుడు, పేద ప్రజలు ఉన్నతంగా బతకాలని ఆశించి కృషి చేసిన వ్యక్తిని నేను కోల్పోయాను.
పాసవాన్ అత్యుత్తమ పార్లమెంటు సభ్యుడు, మంత్రి. అనేక విధాన రూపకల్పనల్లో భాగస్వామ్యం పంచుకున్నారు. అత్యయిక స్థితి సమయంలో ప్రజాస్వామ్యంపై జరుగుతున్న దాడికి వ్యతిరేకంగా నిలబడ్డారు."
- నరేంద్రమోదీ, ప్రధానమంత్రి
నిటారైన వ్యక్తి: నితీశ్
రామ్విలాస్ పాసవాన్ మృతి పట్ల బిహార్ ముఖ్యమంత్రి నితీశ్ కుమార్ విచారం వ్యక్తం చేశారు. భారత రాజకీయాల్లో పాసవాన్ నిటారైన వ్యక్తి అని కీర్తించారు నితీశ్. "పదునైన వక్త, బహుళ ప్రజాదరణ పొందిన నాయకుడు, సమర్థుడైన కార్యశీలి, స్నేహపూర్వక వ్యక్తిత్వం ఆయనది" అని అన్నారు.
కలిసి పనిచేశాం: తేజస్వీ
పాసవాన్ కుటుంబానికి ఆర్జేడీ నేత తేజస్వీ యాదవ్ సంతాపం ప్రకటించారు. అత్యంత కీలకమైన సమయంలో రామ్విలాస్.. ఆయన కుమారుడు చిరాగ్ పాసవాన్కు దూరమయ్యారని అభిప్రాయపడ్డారు. పాసవాన్తోనే తన రాజకీయ జీవితాన్ని ప్రారంభించానని గుర్తుచేసుకున్నారు యాదవ్. 2010లో ఎల్జేపీ, ఆర్జేడీ కూటమిగా ఉన్నప్పుడు పాసవాన్తో కలిసి ఎన్నో ప్రచార సభల్లో పాల్గొన్నట్టు పేర్కొన్నారు.
ఇదీ చూడండి: పోలీసు అధికారి నుంచి కేంద్ర మంత్రి వరకు..
