రాజ్యసభ ఉద్యోగుల హౌసింగ్ కాంప్లెక్స్కు శంకుస్థాపన చేశారు ఉపరాష్ట్రపతి, రాజ్యసభ ఛైర్మన్ వెంకయ్య నాయుడు. దిల్లీలోని ఆర్కే పురమ్లో రూ. 46 కోట్లతో ప్రాజెక్టు నిర్మిస్తున్నారు. 2003లో ఈ ప్రాజెక్టుకు స్థలం కేటాయించినప్పుటికీ.. పనులు ప్రారంభించటంలో జాప్యం కావటంపై ఆందోళన వ్యక్తం చేశారు వెంకయ్య.
" 17 ఏళ్లపాటు జాప్యం ఫలితంగా రాజ్యసభ సచివాలయంపై అనవసరపు ఖర్చులు చేరి అదనపు భారం పడింది. విలువైన భూ వనరులను ఉపయోగించుకోక పోవటానికి కారణం సామాజిక, ఆర్థిక, చట్ట, పరిపాలనాపరమైన అడ్డంకులే. ఆ అడ్డంకులు తొలగించేందుకు గత రెండేళ్లలో పలుమార్లు అధికారులతో చర్చలు జరిపాం."
- వెంకయ్య నాయుడు, ఉపరాష్ట్రపతి
2003లో కేటాయించిన 8,700 చదరపు మీటర్లు స్థలాన్ని సకాలంలో వినియోగించుకుని ఉంటే సచివాలయానికి ఇంటి రెంటు, ఇతర అలవెన్స్లు కలిసొచ్చేవన్నారు వెంకయ్య. ఎన్డీఎంసీ కాంప్లెక్స్లో ఉన్న ఆర్ఎస్టీవీకి ఏడాదికి రూ. 30 కోట్ల వార్షిక రెంటు కడుతున్నట్లు పేర్కొంటూ.. ఛానల్ను ఆర్కే పురామ్కు మార్చటం ద్వారా భారీ మొత్తం మిగులుతుందన్నారు. అలాగే.. హౌసింగ్ కాంప్లెక్స్ పని ప్రదేశానికి దగ్గరగా ఉండటం ద్వారా ఉద్యోగుల్లో ఉత్సాహాన్ని నింపుతుందన్నారు వెంకయ్య.
ఇదీ చూడండి: నేపాల్ వల్లే బిహార్కు ఇన్ని ఇబ్బందులు: నితీశ్
