సాంకేతికత సాయంతో వ్యర్థాల సేకరణ యంత్రం

చెత్త సేకరించేవారు వచ్చే వరకు ఎదురు చూసి, వారు రాకపోతే రెండు మూడు రోజుల వరకూ ఇంట్లోనే ఉంచి.. తీరా దాన్ని పడేయడం భారంగా భావిస్తుంటారు కొందరు. ఇలాంటి సమస్యలు పట్టణాల్లో మరీ ఎక్కువగా చూస్తుంటాం. వీటికి పరిష్కారంగా సాంకేతికత సాయంతో వ్యర్థాల సేకరణను సులభం చేశారు ఓ వ్యక్తి. ఇంతకీ ఆయన ఏం చేశారో తెలుసా!

పట్టణాల్లో వ్యర్థాల సేకరణ తీవ్ర సమస్యగా మారింది. ఈ తరుణంలో చెత్త సేకరణ కోసం వినూత్నంగా ఆలోచించి సాంకేతికత సాయంతో ఓ 'గార్బేజ్​ క్యాన్'​ తయారు చేశారు కర్ణాటకకు చెందిన విశ్వనాథ్​​ పాటిల్. ఈ వ్యర్థాల్ని ఎప్పటికప్పుడు సేకరించేందుకు ప్రత్యేకమైన వాహనాన్ని తయారు చేశారు. పర్యావరణహితమైన గార్బేజ్​ క్యాన్​ల తయారీతో పలువురి మన్ననలు పొందుతున్నారు.

స్వచ్ఛ-స్వస్థా..

కర్ణాటక హుబ్బళ్లికి చెందిన విశ్వనాథ్​​ పాటిల్ ఈ అధునాతన గార్బేజ్​ క్యాన్​ను తయారు చేయడమే కాకుండా.. 'స్వచ్ఛ-స్వస్థా' ట్రస్ట్​ ఏర్పాటు చేసి నాలుగు సంవత్సరాల నుంచి పర్యావరణ పరిరక్షణ కోసం సేవలిందిస్తున్నారు.

"10 నుంచి 15 ఇళ్ల వరకు ఒక గార్బేజ్ క్యాన్​​ను ఏర్పాటు చేసుకుంటే చాలు. పర్యావరణహితం కోసం ఈ చెత్తబుట్టను భూగర్భంలో ఏర్పాటు చేస్తున్నాం. వ్యర్థాలు సేకరించే వాహనం నుంచి ఎలాంటి దుర్వాసన వంటి సమస్యలూ ఉండవు. ఇద్దరు వ్యక్తులు తోడ్పడితే చాలు.. చెత్త సేకరించడం, మళ్లీ గార్బేజ్​ క్యాన్​ను ఏర్పాటు చేయడం లాంటి అన్ని పనులూ ఈ వాహనమే చూసుకుంటుంది. చెత్త నుంచి వచ్చే నీరు కూడా బయటకు రాకుండా వాహనంలో ఓ ప్రత్యేకమైన ట్యాంక్​ ఏర్పాటు చేశాం."

-విశ్వనాథ్ పాటిల్.

గార్బేజ్​ బిన్​

కొన్ని సంస్థల సాయంతో ఈ ప్రాజెక్టు తాను అనుకున్నట్లు రూపుదిద్దుకోవడంపై ఆనందం వ్యక్తం చేశారు విశ్వనాథ్. అన్ని మెట్రో నగరాల్లో ఈ పద్ధతిని అవలంబిస్తే బాగుంటుందని అభిప్రాయపడ్డారు.

ఇదీ చదవండి:టీకా పంపిణీలో భారత్​ సరికొత్త రికార్డులు