ప్రపంచదేశాలను వణికిస్తున్న కరోనా.. గర్భిణీలపైనా తీవ్ర ప్రభావం చూపుతున్నట్లు ఓ అధ్యయనం వెల్లడించింది. అమెరికాలో కరోనాతో 16 మంది గర్భిణీల ప్లెసెంటా( పిండాన్ని మాతృకణజాలంతో కలిపే ప్రత్యేక నిర్మాణం)లో గాయాలైనట్లు తెలిపింది. చికాగోలోని నార్త్వెస్టర్న్ విశ్వవిద్యాలయం నిర్వహించిన ఈ అధ్యయనం.. అమెరికన్ జర్నల్ ఆఫ్ క్లినికల్ పాథాలజీలో ప్రచురితమైంది. ఇందులో కొవిడ్ సోకిన గర్భవతుల ప్లెసెంటా ఆరోగ్య పరిస్థితులను పరిశీలించారు.
16 మంది రోగులలో.. 15 మంది పండంటి బిడ్డలకు జన్మనివ్వగా... వారంతా పూర్తి ఆరోగ్యంగా ఉన్నట్లు పరిశోధకులు తెలిపారు. ఒక మహిళకు గర్భస్రావం జరిగిందని పేర్కొన్నారు. పిల్లలెవరూ వైరస్ బారిన పడలేదని స్పష్టం చేశారు.
ఈ మహిళల్లో నలుగురు కరోనా లక్షణాలతో ఆసుపత్రుల్లో చేరగా.. ప్రసవానికి ముందు పాజిటివ్ నిర్ధరణ అయ్యినట్లు వివరించారు. మరో ఐదుగురికి ఎటువంటి లక్షణాలు గుర్తించలేదని స్పష్టం చేశారు. మిగిలిన వారిలో డెలివరీ కోసం వచ్చినప్పుడు వైరస్ సోకినట్లు పేర్కొన్నారు.
ఆందోళన కలిగించే విషయం..
ఈ ఫలితాలు కాస్త ఆందోళన కలిగిస్తున్నట్లు పరిశోధకులు తెలిపారు. మహిళల ప్లెసెంటాలో రక్తం గడ్డ కడ్డటం, రక్త నాలాలు అసాధారణంగా కనిపిస్తున్నట్లు నివేదికలో వెల్లడైంది. కొవిడ్ సంక్రమించిన గర్భిణీలపై ఇతర రోగుల కంటే ప్రత్యేక శ్రద్ధ వహించాల్సిన అవసరం ఉందని సూచించారు. సాధారణంగా పిండానికి ప్లెసెంటా వెంటిరేటర్లుగా పనిచేస్తుందని, వాటికి గాయాలవడం ఆందోళన కలిగించే విషయమని వెల్లడించారు.
