తుపాను తీవ్రత దృష్ట్యా 3 రాష్ట్రాల ప్రధాన కార్యదర్శులతో(సీఎస్).. కేబినెట్ కార్యదర్శి రాజీవ్ గౌబా నేతృత్వంలోని విపత్తు సంక్షోభ నిర్వహణ కమిటీ సమీక్ష నిర్వహించింది. ఆంధ్రప్రదేశ్, తమిళనాడు, పుదుచ్చేరి సీఎస్లు ఈ భేటీకి హాజరయ్యారు. ముందస్తు చర్యలపై సుదీర్ఘంగా చర్చించారు.
తుఫాను కదలికలు, ఎంత ప్రభావం చూపుతుంది వంటి వివరాలతో ఐఎండీ డీజీ ప్రజెంటేషన్ ఇచ్చారు. ఎటువంటి నష్టం జరగకుండా ముందస్తు జాగ్రత్తలు తీసుకోవాలని ఆదేశించారు గౌబా. తుపాను ప్రభావం నుంచి వీలైనంత త్వరగా బయటపడేందుకు ప్రణాళికలు సిద్ధం చేసుకోవాలని సూచించారు.
అన్ని విధాల సహాయ చర్యలకు, ప్రజలను సురక్షిత ప్రాంతాలకు తరలించేందుకు సిద్ధంగా ఉన్నట్లు సీఎస్లు పేర్కొన్నారు. ఎప్పటికప్పుడు జాతీయ విపత్తు నిర్వహణ బృందం(ఎన్డీఆర్ఎఫ్)తో సంప్రదింపులు జరుపుతున్నట్లు స్పష్టం చేశారు.
కేంద్రం ఆదేశాలు..
- మత్య్సకారులు చేపల వేటకు సముద్రంలోకి వెళ్లవద్దు
- ఇప్పటికే ఉన్న సూచనలు తప్పక అమలు చేయాలి.
- తీరప్రాంతంతో కచ్చా గృహాల్లో ఉన్న వారిని అవకాశం ఉన్నంత త్వరగా సురక్షిత ప్రదేశానికి తరలించాలి.
- తుఫాను ప్రభావిత రాష్ట్రాలకు అన్ని విధాల సహకారం అందించాలని అన్ని శాఖలను కోరిన కేబినెట్ కార్యదర్శి
నవంబర్ 24 నుంచి మూడ్రోజుల పాటు తుపాను ప్రభావం ఎక్కువగా ఉందని భారత వాతావరణ శాఖ(ఐఎండీ) పేర్కొంది. ఆంధ్రప్రదేశ్, తమిళనాడు, పుదుచ్చేరిలపైనే తీవ్రంగా ఉండనున్నట్లు హెచ్చరించింది.
హోం, విద్యుత్, టెలికాం, ఆరోగ్య శాఖ కార్యదర్శులూ సమీక్షలో పాల్గొన్నారు.
