మధ్యప్రదేశ్ ముఖ్యమంత్రి కమల్నాథ్ అనుచరులకు చెందిన రూ. 14.6 కోట్లను ఆదాయపు పన్ను శాఖ అధికారులు స్వాధీనం చేసుకున్నారు. ఐటీ దాడుల్లో 252 విదేశీ మద్యం సీసాలు, నగదు లావాదేవీల సమాచారమున్న కొంత మంది డైరీలు, హార్డ్డిస్క్లు స్వాధీనం చేసుకున్నారు. రాష్ట్రవ్యాప్తంగా జరిపిన దాడుల్లో మొత్తం రూ. 281 కోట్లను జప్తు చేసినట్లు పేర్కొన్నారు.
దిల్లీలోనూ తనిఖీలు
దిల్లీలో అక్రమంగా తరలిస్తున్న రూ.20 కోట్ల నగదునూ జప్తు చేశారు కేంద్ర ప్రత్యక్ష పన్నుల మండలి(సీబీడీటీ) అధికారులు. ఓ ప్రముఖ పార్టీ కార్యాలయానికి కార్యకర్త నగదు తరలిస్తుండగా స్వాధీనం చేసుకున్నట్టు అధికారులు తెలిపారు. కార్యకర్త బంధువుల ఇళ్లలో జరిపిన తనిఖీలతో ఈ మొత్తం మరింత పెరిగే అవకాశముందన్నారు.
రూ.230 కోట్ల అక్రమ లావాదేవీల సమాచారమున్న పుస్తకాన్ని, మరో రూ.242 కోట్ల బిల్లింగ్స్ను, పన్ను ఎగవేతకు పాల్పడిన 80 కంపెనీల ఆధారాల గుర్తించారు ఐటీ అధికారులు.
ఎన్నికల నియమావళికి విరుద్ధమైన ఇలాంటి చర్యలను ఈసీ దృష్టికి తీసుకెళ్తామని ఐటీశాఖ అధికారులు తెలిపారు.
