సామాజిక మాధ్యమ దిగ్గజం ట్విట్టర్ అనేక ఖాతాలను సోమవారం నిలిపివేసింది. సాగుచట్టాలకు వ్యతిరేకంగా దిల్లీ సరిహద్దుల్లో చేపట్టిన నిరసనలకు సంబంధం ఉన్న అనేకమంది రైతుల ఖాతాలు, రైతు సంఖాల ఖాతాలు ఇందులో ఉన్నాయి.
ఈ జాబితాలో కిసాన్ ఏక్తా మోర్చా, బీకేయూ ఏక్తా ఉర్గహన్ ఉన్నాయి. వీటితో పాటు పలువురు వ్యక్తులు, సంస్థల ఖాతాలను కూడా నిలిపివేసింది ట్విట్టర్.
న్యాయపరమైన డిమాండ్ వచ్చినప్పుడు ట్విట్టర్ ఇలా ఖాతాలను 'విత్హోల్డ్' చేస్తుంది.
ప్రసార భారతి సీఈఓ ఖాతా కూడా..
ప్రసార భారతి సీఈఓ శశి శేఖర్ వెంపటి ట్విట్టర్ ఖాతాను కూడా ట్విట్టర్ నిలిపివేసింది. ఈ వ్యవహారం సర్వత్రా చర్చనీయాంశమైంది.
అధికారిక యంత్రాంగం నుంచి వచ్చిన అభ్యర్థన మేరకు ఈ విధంగా స్పందించినట్టు ట్విట్టర్ వెల్లడించింది.
అయితే తమ చర్యలకు కారణాలు తెలపాలని ట్విట్టర్ను ప్రసార భారతి డిమాండ్ చేసింది.
శశి శేఖర్ ఖాతా నిలిపివేతపై భాజపా ఎంపీ, పార్లమెంటరీ కమిటీ(డేటా రక్షణ బిల్లు) ఛైర్మన్ మీనాక్షి లేఖి మండిపడ్డారు. సరైన చర్యలు తీసుకోవాలని ట్విట్టర్ను డిమాండ్ చేయడం వల్లే ఆయన ఖాతాను తొలగించారని ఆరోపించారు.
ప్రధానమంత్రి నరేంద్రమ మోదీకి వ్యతిరేకంగా పోస్టులు చేస్తున్న ఖాతాను తొలగించాలని శశి ట్విట్టర్ను కోరారని.. బదులుగా ఆయన ఖాతానూ సామాజిక మాధ్యమ దిగ్గజం నిలిపివేసిందని పేర్కొన్నారు.
ఇదీ చూడండి:- 'మేం రైతులం.. ఎదురుచూపులు మాకు అలవాటే!'
