ఫిబ్రవరి 24 నుంచి అమెరికా అధ్యక్షుడు డొనాల్డ్ ట్రంప్ రెండు రోజులపాటు భారత్లో పర్యటించనున్నారు. ఈ పర్యటనలో భాగంగా జాతిపిత మహాత్మాగాంధీ సబర్మతీ ఆశ్రమాన్ని సందర్శించనున్నారు ట్రంప్. ఈ నేపథ్యంలో ట్రంప్కు అరుదైన బహుమతులు బహూకరించనున్నారు ఆశ్రమ నిర్వాహకులు. మహాత్ముడి గుర్తులైన నూలు వడికే రాట్నం, మహాత్ముడి చిత్రం, చేనేత ఖాదీ వస్త్రాలను బహుమతిగా అందజేస్తారు.
"గుజరాత్ ప్రభుత్వం పలు బహుమతులను ఇవ్వాలని యోచిస్తోంది. మా తరఫున మేం కూడా పలు బహుమతులు అందజేసేందుకు నిర్ణయం తీసుకున్నాం. నూలు వడికే రాట్నం, గాంధీ ఆత్మకథ, 'మై లైఫ్ మై మెసేజ్' అనే మరో పుస్తకం, గాంధీ చిత్రపటాలు అందించనున్నాం. ఇవి దేశ స్వాతంత్య్ర ఉద్యమంలో ఎంత కీలకంగా పనిచేశాయో వివరించనున్నాం."
-అతుల్ పాండ్య, సబర్మతీ ఆశ్రమ డైరెక్టర్
ఆశ్రమ నిర్వాహకులు ఖాదీ మాలలతో ట్రంప్ను ఆహ్వానించనున్నట్లు సమాచారం. ఆశ్రమం వెనకాల ఓ వేదికను ఏర్పాటు చేస్తున్నారు. ఈ వేదిక నుంచి సబర్మతీ ఆశ్రమాన్ని చూపిస్తారని తెలుస్తోంది.
ఇదీ చూడండి: గూగుల్‌ ఎర్త్‌ వ్యూలో భారత్ దృశ్యాలు అద్భుతం
