బంగాల్లో రాజకీయాలు రోజురోజుకు వేడెక్కుతున్నాయి. బంగాల్లో ఎలాగైనా తమ జెండా పాతాలని భావిస్తున్న భాజపా ఎత్తులకు ఘాటుగా స్పందిస్తోంది తృణమూల్ కాంగ్రెస్(టీఎంసీ). ఈ క్రమంలో రాష్ట్ర గవర్నర్ జగదీప్ ధనకర్ను తొలగించాలని రాష్ట్రపతి రామ్నాథ్ కోవింద్కు విజ్ఞప్తి చేసింది టీఎంసీ. గవర్నర్.. రాజ్యాంగ పరిధి ధాటి వ్యవహరించడమే కాకుండా.. రాష్ట్ర ప్రభుత్వం, పాలన యంత్రాంగానికి వ్యతిరేకంగా పదేపదే వ్యాఖ్యలు చేస్తున్నారని ఆరోపించింది.
ధనకర్ను తొలగించాలని డిమాండ్ చేస్తూ.. రాష్ట్రపతికి లేఖ రాసింది టీఎంసీ ఎంపీల బృందం. ఈ లేఖలో రాజ్యసభ టీఎంసీ ఎంపీ సుఖెందు శేఖర్ రాయ్ సహా ఎంపీ కల్యాణ్ బెనర్జీ, సుదీప్ బందోపాధ్యాయ, డెరెక్ ఒబ్రెయిన్, కకోలి ఘోష్ దస్తీదర్ సంతకాలు చేశారు.
రాష్ట్ర గవర్నర్గా నియమితులైనప్పటినుంచీ రాజ్యాంగ పరిమితులను ఉల్లంఘించి రాష్ట్ర ప్రభుత్వం, అధికారులు, మంత్రులకు వ్యతిరేకంగా ధనకర్ వ్యాఖ్యలు చేస్తూనే ఉన్నారని రాయ్ ఆరోపించారు. కేంద్రంలోని భాజపా సర్కారు ఆదేశాలనుసారమే బంగాల్లో టీఎంసీ ప్రభుత్వాన్ని ఇరుకున పెట్టేందుకు ఇలా చేస్తున్నారని ఆరోపించారు. 75 ఏళ్ల బంగాల్ చరిత్రలో ఈ విధంగా ఎప్పుడూ జరగలేదన్నారు.
అయితే రాజ్యాంగ పరిధికి లోబడే గవర్నర్ వ్యవహరిస్తున్నారని స్పందించింది భాజపా.
ఇదీ చూడండి: 'ధర్మెగౌడ ఆత్మహత్యపై ఉన్నత స్థాయి విచారణ'
