'ఐదేళ్లలో మూడు మెరుపు దాడులు'

గత ఐదేళ్లలో భారత్​ పాకిస్థాన్​పై మూడు సార్లు మెరుపు దాడులు చేసిందని కేంద్ర హోంమంత్రి రాజ్ నాథ్​సింగ్ ఉద్ఘాటించారు. రెండింటి విషయం అందరికీ తెలుసని మూడవ దాడి వివరాలు వెల్లడించడం కుదరదన్నారు.

భారత్​ గత ఐదేళ్ల కాలంలో మూడు సార్లు దాయాది పాకిస్థాన్​పై దాడులు జరిపిందన్నారు కేంద్ర హోంమంత్రి రాజ్​నాథ్ సింగ్. భారత్ ఇక ఏమాత్రం బలహీన దేశం కాదని ఉద్ఘాటించారు రాజ్​నాథ్. విభేదాలన్నింటిని పక్కనపెట్టి దేశం కోసం నిలబడాల్సిన పరిస్థితులు ప్రస్తుతం దేశంలో నెలకొన్నాయన్నారు. వైమానిక దాడులు సైనిక చర్య కాదని అక్కడ సాధారణ పౌరులకు నష్టం జరగలేదని స్పష్టం చేశారు. భారత్​లో మరిన్ని దాడులకు కుట్ర చేస్తున్నందునే ఉగ్రవాద స్థావరాలపై దాడులు చేపట్టాల్సి వచ్చిందన్నారు.

పుల్వామా ఘటన అనంతరం చేపట్టిన వైమానిక దాడులతో దీటైన సమాధానమిచ్చాం అని రాజ్​నాథ్ పేర్కొన్నారు. ఉగ్రవాదానికి వంత పాడటం కొనసాగిస్తే పాక్ భారీ మూల్యం చెల్లించుకోవాల్సి వస్తుందని హెచ్చరించారు. భారత్​ ఎవరిపైనా విద్వేషాలు రెచ్చగొట్టదని, ఎవరైనా అలాంటి చర్యలకు పాల్పడితే ఉపేక్షించదన్నారు.

"గత ఐదేళ్లలో మూడుసార్లు పాకిస్థాన్​లోకి చొచ్చుకెళ్లి మెరపుదాడులు నిర్వహించాం. రెండు నేను చెప్పగలను. కానీ మరొకటి చెప్పలేను. పాకిస్థాన్​ నుంచి ఉగ్రవాదులు చొరబడి మన సైనికులపై దాడి చేశారు. బదులుగా ఉరీ ఘటనతో మనం సమాధానమిచ్చాం. పాకిస్థాన్​ భూభాగంలోకి ప్రవేశించాం. మీకందరికి తెలుసు. రెండోది పాక్​ గగనతలంలోకి ప్రవేశించి వైమానిక దాడి చేశాం. మూడవ దాడి వివరాలు నేను చెప్పలేను." -రాజ్​నాథ్​సింగ్, కేంద్ర హోంమంత్రి

ఉగ్రవాదానికి వ్యతిరేకంగా భారత్ చేస్తోన్న పోరాటాన్ని దేశంలోని ఏ శక్తి ఆపలేదని ప్రతిపక్షాల్ని ఉద్దేశించి వ్యాఖ్యానించారు. భాజపా సున్నా సీట్ల నుంచి 2014లో సంపూర్ణ మెజారిటీ సాధించే వరకు ఎదిగిందని గుర్తు చేశారు రాజ్​నాథ్. అత్యధిక సభ్యులతో భాజపా ప్రపంచంలోనే అతిపెద్ద పార్టీగా అవతరించిందన్నారు.

ప్రపంచంలో అమెరికా, రష్యా, చైనాలు అత్యంత శక్తిమంతమైన దేశాలు. 2028 నాటికి భారత్ ఆ దేశాల సరసన నిలబడుతుందని రాజ్​నాథ్​ ధీమా వ్యక్తం చేశారు. ప్రపంచంలో వేగంగా ఎదుగుతున్న ఆర్థిక వ్యవస్థల్లోభారత్ఒకటని హర్షం వ్యక్తం చేశారు.

ఇదీ చూడండి:"మసూద్​ను విడిచిపెట్టింది మీరు కాదా..?"