హిందుత్వ భావజాల సిద్ధాంతకర్త వి.డి. సావర్కర్కు భారతరత్న పురస్కారం ఇవ్వకూడదని డిమాండ్ చేసేవారంతా అండమాన్ జైలును చూడాలని శివసేన అధికార ప్రతినిధి సంజయ్ రౌత్ అన్నారు. రెండు రోజులు పాటు ఆ జైలులో గడిపితే బ్రిటిషువారి చేతిలో సావర్కర్ పడిన బాధలేమిటో తెలుస్తాయన్నారు. బ్రిటిషువారికి క్షమాబిక్ష పత్రం సమర్పించినట్లు వాదనలు ఉన్నందున భారతరత్న ఇవ్వకూడదని కాంగ్రెస్ అంటోంది. ఒకవేళ ఆయనకు ఇస్తే ఆ జైలులో శిక్ష అనుభవించి క్షమాభిక్ష అడగని యోధులందరికీ భారతరత్న ఇవ్వాలని డిమాండ్ చేసింది. వీటిని దృష్టిలో పెట్టుకొనే సంజయ్ రౌత్ ఈ వ్యాఖ్యలు చేశారు.
1911లో నాసిక్ జిల్లా కలెక్టర్ ఎ.టి.ఎం జాక్సన్ను హత్య చేసిన కేసులో దోషిగా తేలడం వల్ల సావర్కర్కు అండమాన్ జైలులో శిక్ష విధించారు. ప్రస్తుతం ఈ జైలును స్మారక కేంద్రంగా మార్చారు.
హిందుత్వవాదులే సందర్శించాలి:కాంగ్రెస్
రౌత్ వ్యాఖ్యలపై కాంగ్రెస్ పార్టీ మహారాష్ట్ర శాఖ అధికార ప్రతినిధి సచిన్ సావంత్ స్పందించారు. క్షమాభిక్ష అడగని స్వాతంత్య్ర సమరయోధుల కష్టాలు తెలుసుకోవడానికి హిందుత్వవాదులే అండమాన్ జైలును సందర్శించాలని వ్యాఖ్యానించారు. 1911 ముందు సావర్కర్ ఆలోచనలు ఒక విధంగా, 1923 తర్వాత ఆయన సిద్ధాంతాలు మరో విధంగా ఉన్నాయని చెప్పారు. జైలు నుంచి విడుదల అనంతరం సావర్కర్ అనుసరించిన సిద్ధాంతాలనే కాంగ్రెస్ వ్యతిరేకిస్తున్నట్లు తెలిపారు.
గతాన్ని తవ్వొద్దు: శివసేన
ఈ అంశంపై శివసేన యువనేత ఆదిత్య ఠాక్రే స్పందించారు. పాత విషయాలను తవ్వుకోవడం మంచిది కాదని అన్నారు. ఏ హోదాలో రౌత్ ఈ వ్యాఖ్య చేశారో తనకు తెలియదని చెప్పారు. సావర్కర్ భావాలకు ఎల్లప్పుడూ ఆదరణ ఉంటుందని భాజపా నాయకుడు దేవేంద్ర ఫడణవీస్ తెలిపారు.
