ఆర్థిక నుంచి విద్యుత్ శాఖకు బదిలీ అయిన కారణంగా తాను స్వచ్ఛంద పదవీ విరమణ (వీఆర్ఎస్)కు దరఖాస్తు చేసుకోలేదని కేంద్ర ఆర్థిక శాఖ మాజీ కార్యదర్శి సుభాష్ చంద్ర గార్గ్ స్పష్టం చేశారు. బదిలీ కన్న ముందే వీఆర్ఎస్పై ప్రధాన మంత్రి కార్యాలయాన్ని సంప్రదించినట్లు వెల్లడించారు.
"నేను బదిలీ అవడానికంటే చాలా ముందే... జూలై 18వ తేదీన వీఆర్ఎస్ కోసం ప్రధాని కార్యలయాన్ని సంప్రదించాను. బదిలీకి, వీఆర్ఎస్కు ఎలాంటి సంబంధం లేదు."
- సుభాష్ చంద్ర గార్గ్, ఆర్థిక శాఖ మాజీ కార్యదర్శి
తన వీఆర్ఎస్ ప్రతిపాదనకు ప్రభుత్వం ఇంకా ఆమోదం తెలపలేదని పేర్కొన్నారు. ఇందుకు మరింత సమయం పట్టే అవకాశముందని ప్రకటించారు. ఇప్పటి వరకు తనుకు అండగా నిలిచినందుకు ప్రభుత్వానికి ఆయన కృతజ్ఞతలు తెలిపారు. ఆర్థిక శాఖ నుంచి తాను ఎంతో నేర్చుకున్నట్లు తెలిపారు.
వీఆర్ఎస్కు ఆమోదం లభిస్తే అక్టోబర్ 31న పదవీ విరమణ పొందనున్నారు. నిజానికి ఆయన 2020 అక్టోబరులో రిటైర్ అవాల్సి ఉంది.
ఆర్థిక వ్యవహారాల బాధ్యతల నుంచి గురువారమే నిష్క్రమించిన గార్గ్.. నేడు విద్యుత్ శాఖ కార్యదర్శిగా బాధ్యతలు స్వీకరించారు.
"విద్యుత్ శాఖ చాలా ముఖ్యమైనది. విద్యుత్ పంపిణీ సంస్కరణలు, ట్రాన్స్ మిషన్, విద్యుదుత్పత్తి సమస్యలు ఇప్పడు నా ముందున్న సవాళ్లు. నా శక్తి మేర విద్యుత్ శాఖకు సేవలందిస్తాను. "
- సుభాష్ చంద్ర గార్గా, విద్యుత్ శాఖ కార్యదర్శి
గార్గ్ నేపథ్యం
1983 రాజస్థాన్ క్యాడర్ నుంచి ఐఏఎస్ అధికారిగా గార్గ్ ఎంపికయ్యారి. 2014లో కేంద్ర ప్రభుత్వ వ్యవహారాల్లోకి వచ్చారు. 2017 వరకు ఈయన ప్రపంచ బ్యాంకు ఎగ్జిక్యూటివ్ డైరెక్టర్గా పని చేశారు. 2017 జూన్ నుంచి ఆర్థిక వ్యవహారాల కార్యదర్శిగా నియమితులయ్యారు. 2019 మార్చిలో ఆర్థిక కార్యదర్శిగా బాధ్యతలు స్వీకరించారు.
ఆర్థిక కార్యదర్శిగా గార్గ్ ద్రవ్య విధానాలు, ఆర్బీఐ సంబంధిత వ్యవహారాల్లో కీలకంగా పని చేశారు. 2019-20 కేంద్ర ప్రభుత్వ బడ్జెట్ రూపకల్పనలో గార్గ్ ముఖ్య పాత్రవహించారు.
