ముత్తాత ఆచూకీ కోసం మారిషస్​ నుంచి భారత్​కు...!

సినిమాల్లో కథానాయకుడు బంధువులను వెతుక్కుంటూ దేశమంతా చుట్టొచ్చే దృశ్యాలు చూస్తూనే ఉంటాం. నిజ జీవితంలోనూ అలానే జరిగింది. పూర్వీకుల జాడ వెతుక్కుంటూ ఓ వ్యక్తి  దేశం దాటి వచ్చాడు. ఎట్టకేలకు ఒకటిన్నర శతాబ్దం తర్వాత తన ముత్తాత గ్రామాన్ని చేరుకున్నాడు.

మారిషస్​లో స్థిరపడ్డ ఓ భారతీయ కుటుంబ సభ్యులు... దాదాపు 166 ఏళ్ల తర్వాత స్వదేశానికి వచ్చి తమ మూలాలను కనుక్కున్నారు. హేమానంద్​ బద్రీ విశ్రాంత​ పోలీస్ అధికారి. భార్య విద్యావతి ప్రభుత్వ ఉద్యోగి. వీరిద్దరూ తమ పూర్వీకుల జాడను అన్వేషిస్తూ బిహార్​ రాజధాని పట్నా చేరుకున్నారు.

కథ ఇక్కడ మొదలైంది..

హేమానంద్​ ముత్తాత బద్రీ.... జూలియా అనే ఓడలో కూలీగా పనిచేసేవారు. పని కోసం కోల్‌కతా నుంచి మారిషస్‌ వెళ్లిన ఆయన.. తర్వాత అక్కడే స్థిరపడిపోయారు. కొద్ది రోజుల క్రితం ఈ విషయం తెలుసుకున్న హేమానంద్... తన పూర్వీకుల గ్రామానికి వెళ్లాలని, తమ బంధువులెవరైనా ఉంటే కలవాలని తలచాడు.

మొదట మారిషస్​లోని మహాత్మా గాంధీ ఇన్​స్టిట్యూట్​ లైబ్రరీకి వెళ్లి తన ముత్తాతకు సంబంధించిన కొన్ని పత్రాలను సంపాదించాడు హేమానంద్. అందులో అతని చిరునామాలో ఫుల్వారీ పరగనా గ్రామం, దినాపుర్ అని రాసి ఉన్నాయి. అవే నేటి పట్నాలోని ఫుల్వారీ షరీఫ్, దానపుర్. ఈ పత్రాల ఆధారంగా తన పూర్వీకుల కోసం హేమానంద్ తన భార్యతో కలిసి ఫుల్వారీ షరీఫ్ పోలీస్ స్టేషన్​కు చేరుకున్నాడు. పోలీసుల సహకారంతో తన పూర్వీకుల విశేషాలు తెలుసుకున్నాడు హేమానంద్​.

"నేను మారిషస్​ నుంచి వచ్చాను. 1853లో మా ముత్తాత ఇక్కడి నుంచి వచ్చారు. నా పేరు బద్రీ. మూలాలు వెతకడానికి ఇక్కడికి వచ్చాను. ఎవరైనా మా తాత ఫోటోను చూసి గుర్తుపడితే నన్ను సంప్రదించండి."
-హేమానంద్​ బద్రీ

ఐదవ తరం బద్రీ

బద్రీకి హేమానంద్ ఐదవ వారసుడు. హేమ తండ్రి మోతీలాల్, మోతీలాల్ తండ్రి శివానంద్, శివానంద్ తండ్రి గులాబ్‌చంద్, గులాబ్‌చంద్ తండ్రి బద్రీ.

వంశ వృక్షాన్ని తెలుసుకోవాలన్న అతని తపనకు సరిహద్దులు అడ్డు రాలేదు. భారతీయత కాళ్లను పట్టి లాగినట్టు.. ఎట్టకేలకు స్వదేశానికి వచ్చి ఐదు తరాల మూలాలు కనుక్కున్నాడు హేమానంద్.

ఇదీ చూడండి:సెల్ఫీ లేదంటే పెళ్లి కష్టమే-ఎక్కడో తెలుసా!