దేవతల రాజధానిగా పేరుపొందిన హిమాచల్ప్రదేశ్లో అడుగడుగునా దైవమహిమలే. ప్రతి పర్వతంలోనూ శాస్త్రవేత్తలు సైతం తేల్చలేని దేవ రహస్యాలే. ఆ కోవకు చెందిందే కిన్నౌర్ జిల్లాలోని 'కిన్నౌర్ కైలాస్'. 45 అడుగుల పొడవు, 16 అడుగుల వెడల్పుతో మహాశివ లింగం కొలువుదీరిన ఈ పర్వతం రోజుకు ఏడు సార్లు రంగు మారుతుంది. అందుకే ఈ అద్భుతాన్ని తిలకించేందుకు దేశ, విదేశాల ప్రజలు తరలివస్తారు.
శివయ్య శీతాకాలం విడిది...
హిమాలయాల గర్భంలో దాగి ఉన్న కైలాస గిరి.. భోలేనాథుడికి అత్యంత ప్రియమైన స్థలం. అయితే, ఆ శంభో శంకరుడు సర్వాంతరయామి. మరి ఏడాది పొడవునా కైలాసంలోనే ఉండిపొమ్మంటే ఇబ్బందే కదా? అందుకే.. ఏటా శీతాకాల విడిది కోసం ఆ పరమ శివుడు కిన్నౌర్ కైలాస్కు వస్తాడని చెబుతారు ఇక్కడి ప్రజలు.
సూర్యోదయానికి ముందు చుట్టుపక్కల పర్వతాలన్నీ ఓ రంగులో ఉంటే.. కిన్నౌర్ కైలాస్ పర్వతం మాత్రం ఓ ప్రత్యేకమైన ప్రకాశంతో వెలిగిపోతుంది. రోజుకు ఏడు సార్లు ఈ పర్వతం రంగు మారుతుంది. ఇక్కడి శివలింగం రంగు కూడా మారుతూనే ఉంటుంది. అయితే, ఏళ్లుగా సాక్షాత్కరిస్తున్న ఈ అద్భుతం వెనుక రహస్యమేమిటో ఇప్పటికీ నిగూఢమే!
రావణుడూ పూజించెను..
త్రేతాయుగంలో గొప్ప శివభక్తుడైన రావణాసురుడు మానస సరోవర యాత్రకు వెళ్లినప్పుడు ఆయన కిన్నౌర్లో కొద్దిరోజులు బస చేశారని అంటారు. అప్పుడు శివుడు శీతాకాల విడిదిలో ఇక్కడ కొలువుదీరి ఉన్నందున.. రావణుడు ఈ శివలింగానికే పూజలు చేసినట్లు ఇతిహాసాలు చెబుతున్నాయి.
అయితే, ఇప్పుడు సరాహపుర్గా పిలిచే షోనీక్పుర్ రాజ్యాన్ని పాలించిన రాజు.. కిన్నౌర్లో శివలింగాన్ని ప్రతిష్ఠించారని మరో కథ ప్రచారంలో ఉంది.
సంతానమిచ్చే కొలను..
కిన్నౌర్ కైలాస్ శివలింగానికి 500 మీటర్ల దిగువన పార్వతీ కొలను ఉంటుంది. ఇందులో స్నానం ఆచరించినవారికి.. సంతాన ప్రాప్తి కలుగుతుందని ఇక్కడివారి నమ్మకం.
కైలాస యాత్రలు..
కిన్నౌర్ కైలాస్ యాత్రలు 1990లో ప్రారంభమయ్యాయి. అప్పట్లో సమీప గ్రామాల వారు వందలాది గాడిదలు, మేకలను తీసుకుని పర్వతారోహణం చేసేవారు. వారికి తెల్లవారుజామున శంఖం, డోలు శబ్దాలు వినిపించేవి. ఆ సమయంలో కిన్నౌర్ కైలాస్పై పెద్దపెద్ద తారలు రాలిపడుతూ దర్శనమిచ్చేవి. ఆ ప్రాంతంలో ఓ భారీ ఆకారం నడుస్తూ కనిపించిందని ప్రత్యక్ష సాక్షులు చెబుతున్నారు.
"మా గ్రామంలోని ఓ పాడి రైతు.. ఆవులు, మేకలను తీసుకుని కిన్నౌర్ కైలాస్పై ఉన్న ఓ గుహలోకి వెళ్లాడు. ఆయనకు రాత్రిపూట ఓ ధ్వని వినిపించింది. శంఖం, డోలు నగారాలు వినిపించాయి. అప్పుడే పరమశివుడు ఇక్కడే ఉన్నాడని అందరికీ తెలిసింది. అప్పటి నుంచే ఈ కిన్నౌర్ కైలాస్ యాత్రను చేపడుతున్నారు జనం. "
-మాల్వర్ నేగి, స్థానికుడు
