స్వచ్ఛంద కార్యకలాపాల కోసం వినియోగించాల్సిన నిధులను వేర్పాటువాదులు, ఉగ్రవాదులకు మళ్లిస్తున్న ఎన్జీఓలు, ట్రస్ట్లకు సంబంధించిన కేసులో.. వరుసగా రెండో రోజు సోదాలు చేపట్టింది ఎన్ఐఏ(జాతీయ దర్యాప్తు సంస్థ). గురువారం ఉదయాన్నే శ్రీనగర్, దిల్లీలోని 9 ప్రాంతాల్లోని ఆరు ఎన్జీఓలు, ట్రస్టుల్లో ఈ సోదాలు నిర్వహించింది.
ఎన్జీఓల్లో.. ఫలాహ్ ఈ ఆమ్ ట్రస్ట్, ఛారిటి అలియన్స్, హ్యూమన్ వెల్ఫేర్ ఫౌండేషన్, జేకే యతీమ్ ఫౌండేషన్, సాల్వేషన్ మూవ్మెంట్, జేకే వాయిస్ ఆఫ్ విక్టిమ్స్లు ఉన్నాయి. అంతకు ముందు శ్రీనగర్, బందిపోరాల్లో బుధవారం 10 ప్రాంతాల్లో తనిఖీలు చేసింది ఎన్ఐఏ. అలాగే బెంగళూరులోని ఓ ప్రాంతంలో సోదాలు నిర్వహించింది.
స్వచ్ఛంద సేవల ద్వారా నిధులు సేకరించి ఉగ్రసంస్థలకు అందిస్తున్నట్లు వచ్చిన విశ్వసనీయ సమాచారంతో ఈనెల 8వ తేదీన ఐపీసీ సెక్షన్ 120బీ,124ఏ, యూఏ(పీ)ఏ-1967 చట్టంలోని సెక్షన్ 17,18,22ఏ,22సీ, 38,39ల కింద కేసు నమోదు చేసి.. సోదాలు నిర్వహిస్తోంది. ఈ క్రమంలో ఇప్పటికే పలు కీలక పత్రాలు, ఎలక్ట్రానిక్ పరికరాలను స్వాధీనం చేసుకుంది.
ఇదీ చూడండి: జమ్ముకశ్మీర్ 'ఉగ్ర ఎన్జీఓ'ల్లో ఎన్ఐఏ సోదాలు
