బిహార్లో ఓట్ల లెక్కింపుపై అనుమానాలు వ్యక్తం చేస్తోన్న ఆర్జేడీ నేత తేజస్వీ యాదవ్... తాజాగా ముఖ్యమంత్రిగా బాధ్యతలు చేపట్టిన నితీశ్ కుమార్కు శుభాకాంక్షలు తెలిపారు. అయితే.. మరోమారు ఆయన ఎన్నికను ప్రశ్నించారు తేజస్వీ. నితీశ్ ప్రజలు ఎన్నుకున్న నాయకుడు కాదని, నామినేషన్ ద్వారా సీఎం అయ్యారని తన సామాజిక మాధ్యమ బ్లాగ్లో రాసుకొచ్చారు.
" ముఖ్యమంత్రిగా నామినేట్ అయిన నితీశ్ కుమార్ జీకి నా శుభాకాంక్షలు. ఆయన కుర్చీ ఆశయం కోసం కాకుండా.. ఎన్డీఏ హామీ ఇచ్చిన 19 లక్షల ఉద్యోగాల కల్పన, విద్య, వైద్యం, జీవనోపాధి, నీటిపారుదల, న్యాయం సహా బిహార్ ప్రజల ఆక్షాంక్షలు నెరవేర్చుతారని నమ్ముతున్నా. "
- తేజస్వీ యాదవ్, ఆర్జేడీ అధినేత.
నితీశ్ ఎన్డీఏలోనే సీఎంగా ఉంటారనుకుంటున్నా..
బిహార్కు జేడీయూ అధినేత నితీశ్కుమార్ ఎన్డీఏ తరఫునే ముఖ్యమంత్రిగా కొనసాగుతారని అనుకుంటున్నట్లు ఎల్జేపీ నేత చిరాగ్ పాసవాన్ పేర్కొన్నారు. ముఖ్యమంత్రిగా ఏడోసారి ప్రమాణస్వీకారం చేసిన నితీశ్కు అయన వ్యంగ్యంగా శుభాకాంక్షలు తెలిపారు. 'మరోసారి సీఎం పదవి చేపట్టిన సందర్భంగా నితీశ్కు శుభాకాంక్షలు. ప్రభుత్వం పూర్తి కాలం కొనసాగుతుందని అనుకుంటున్నా. అదే విధంగా ఎన్డీఏ తరపునే సీఎంగా కొనసాగుతారని భావిస్తున్నా. మిమ్మల్ని సీఎంగా చేసిన భాజపాకు, సీఎం అయినందుకు మీకు మరోసారి అభినందనలు తెలియజేస్తున్నా' అని చిరాగ్ ట్విట్టర్లో పేర్కొన్నారు. ఎల్జేపీ తనకు పంపిన మేనిఫెస్టోలని హామీల్ని నెరవేర్చే దిశగా నితీశ్ పనిచేయాలని సూచించారు.
ఇదీ చూడండి: బిహార్లో ఘనంగా నితీశ్ ప్రమాణ స్వీకారం
