ఒక భారత జవాన్కు పాకిస్థాన్లో అభిమానులు ఉన్నారంటే మీరు నమ్మగలరా? నమ్మశక్యం కాకపోయినా అదే నిజం. సామాజిక మాధ్యమాల్లో వైరల్ అవుతున్న ఈ విషయాన్ని మీరే చూడండి.
పాకిస్థాన్లోని ఓ టీ స్టాల్లో వింగ్ కమాండర్ అభినందన్ ఛాయ్ తాగుతున్నట్లు ఓ బానర్ పెట్టారు. దానిపై " ఐసీ ఛాయ్ దుష్మన్ కో భీ దోస్త్ బనాయే" అని రాసి ఉంది. ఈ విధంగా అభినందన్ ఇరుదేశాల మధ్య స్నేహ వారధి నిర్మించినవారయ్యారు.
పాక్ సైన్యం చేతికి చిక్కినా మొక్కవోని ఆత్మవిశ్వాసంతో నిలిచిన అభినందన్కు దాయాది పాకిస్థాన్లోనూ అభిమానులు ఏర్పడ్డారు. అభినందన్ను భారత్-పాక్ల మధ్య స్నేహ రాయబారిగా భావిస్తున్నారు.
పాకిస్థాన్లోని ఈ టీ స్టాల్, దాని బ్యానర్ చిత్రాలను ట్విట్టర్లో ఒమర్ ఫరూక్ పోస్ట్ చేశారు. ఇప్పుడు ఈ వార్త సామాజిక మాధ్యమాల్లో వైరల్ అవుతోంది.
'వర్థమాన్ అభినందన'లు!
పుల్వామా ఉగ్రదాడిలో భారత సీఆర్పీఎఫ్ జవానులు 40 మంది అమరులయ్యారు. దీనికి ప్రతీకారంగా పాక్ ఆక్రమిత కశ్మీర్ బాలాకోట్లోని జైషే మహమ్మద్ ఉగ్రస్థావరాలపై భారత్ దాడి చేసింది. ప్రతిగా పాకిస్థాన్ భారత భూభాగంపై వైమానిక దాడికి పాల్పడింది. దీనిని భారత్ దీటుగా తిప్పికొట్టింది.
వింగ్ కమాండర్ అభినందన్ తన మిగ్-21తో పాక్కు చెందిన ఎఫ్-16 యుద్ధ విమానాన్ని కూల్చేశారు. తరువాత తన మిగ్ను కోల్పోయి, పాక్ భూభాగంలో దిగారు. అతనిపై స్థానికులు దాడి చేశారు. అనంతరం పాక్ సైన్యం అతనిని అదుపులోకి తీసుకుంది. ఆ సమయంలో అభినందన్ చూపిన ధైర్యసాహసాలు, ఆత్మవిశ్వాసం ప్రతి ఒక్కరి హృదయాన్ని హత్తుకున్నాయి.
భారత దౌత్యం, అంతర్జాతీయ ఒత్తిడితో పాక్ అభినందన్ను శాంతి సూచికగా విడుదల చేసింది. ఈ అసమాన వీరకిశోరం వాఘా సరిహద్దు ద్వారా భారత్ చేరుకున్నారు. భారత దేశమంతా అతని రాకతో సంబరాలు చేసుకున్నారు.
