ప్రధానిపై అభ్యంతరకర వ్యాఖ్యలు చేసిన తమిళ వక్తపై కేసులు

ప్రధాని నరేంద్రమోదీ, కేంద్ర మంత్రి అమిత్​ షాలపై వివాదాస్పద వ్యాఖ్యలు చేసినందుకు తమిళనాడు వక్త నెల్లై కన్నన్​ను అరెస్టు చేయాలని ఫిర్యాదులు అందినట్లు పోలీసులు తెలిపారు. రెండు వర్గాల మధ్య చిచ్చు పెట్టే విధంగా మాట్లాడారన్న ఆరోపణల నేపథ్యంలో కేసు నమోదు చేసినట్లు అధికారులు స్పష్టం చేశారు.

తమిళనాడుకు చెందిన వక్త నెల్లై కన్నన్...​ ప్రధాని నరేంద్ర మోదీ, కేంద్ర హోంమంత్రి అమిత్​షాలపై వివాదాస్పద వ్యాఖ్యలు చేశారంటూ పెద్ద ఎత్తున ఫిర్యాదులు అందాయని పోలీసులు తెలిపారు. అంతేకాకుండా రెండు మతాల మధ్య చిచ్చు రగిల్చే విధంగా ప్రసంగించినట్లు అభియోగాలు అందినందున కేసు నమోదు చేసినట్లు అధికారులు తెలిపారు.

ఈ నేపథ్యంలో తమిళ నాడు వక్త నెల్లై కన్నన్​ను అరెస్టు చేయాటానికి అతని ఇంటికి వెళ్లారు పోలీసులు. ఆ సమయంలో కన్నన్​కు ఛాతీ నోప్పి రావటం వల్ల వెంటనే అతనిని అంబులెన్స్​లో ఆసుపత్రికి తరలించినట్లు వెల్లడించారు.

అసలు ఏం జరిగింది....

పౌరచట్టానికి వ్యతిరేకంగా సోషల్​ డెమోక్రటిక్​ పార్టీ ఆఫ్​ ఇండియా (ఎస్​డీపీఐ) తిరునల్వేలిలో ఓ కార్యక్రమాన్ని నిర్వహించింది. ఈ కార్యక్రమంలో ముఖ్య అతిధిగా హాజరయ్యారు నెల్లై కన్నన్​. ఈ సమావేశంలో ప్రధాని నరేంద్ర మోదీ, అమిత్​షాలపై వివాదాస్పద వ్యాఖ్యలు కన్నన్​ చేశారు.

క్రిమినల్​ కేసు...

అతని వ్యాఖ్యల వల్ల ప్రధానికి, కేంద్ర మంత్రి ప్రాణాలకు ముంపు పొంచి ఉందని అభిప్రాయ పడ్డారు తమిళనాడు రాష్ట్ర భాజపా ప్రతినిధి నారాయణ్​ తిరుపతి. ఇటువంటి అభ్యంతకర వ్యాఖ్యలు చేసినందుకుగాను అతనిపై బెదిరింపు, హత్యా ప్రయత్నం, ఇతర సెక్షన్ల కింద కేసు నమోదు చేయాలని కోరారు.

ముఖ్యమంత్రి, డిప్యూటీ సీఎంపై...

కన్నన్​ మాట్లాడిన దానికి సంబంధించిన వీడియోలు సామాజిక మాధ్యమాల్లో బాగా వైరల్​ అయ్యాయి. ప్రధానిపైనే కాకుండా తమిళనాడు ముఖ్యమంత్రి పళని స్వామి, ఉపముఖ్యమంత్రి పన్నీర్​సెల్వంపైనా అభ్యంతరకర వ్యాఖ్యలు చేశారని అనేక ఫిర్యాదులు అందినట్లు పోలీసులు తెలిపారు.

ఈ ఫిర్యాదులతో కన్నన్​పై ఐపీసీ సెక్షన్​ 504, 505,505(2) కింద కేసు నమోదు చేసినట్లు పోలీసులు స్పష్టం చేశారు.

ఇదీ చూడండి:దేశ ప్రజలకు రాష్ట్రపతి నూతన ఏడాది శుభాకాంక్షలు