దేశవ్యాప్తంగా కొనసాగుతున్న లాక్డౌన్ను పొడిగిస్తూ.. కేంద్ర ప్రభుత్వం ఇచ్చిన మార్గదర్శకాలకు అనుగుణంగా తమిళ సర్కార్ చర్యలు చేపట్టింది. తమిళనాడులో జూన్ 30 వరకూ లాక్డౌన్ కొనసాగుతుందని ముఖ్యమంత్రి పళనిస్వామి స్పష్టం చేశారు. అన్ని జిల్లాలను 8 జోన్లుగా విభజించనున్నట్లు ప్రకటించిన ఆయన.. ప్రయాణాలకు ఇకపై "ఈ-పాస్‌"లు అవసరం లేదని స్పష్టంచేశారు. అంతరాష్ట్ర బస్సుల రవాణా, మెట్రో రైళ్లు, సుబర్బన్ రైళ్లు, ప్రార్థన స్థలాలపై ఆంక్షలు కొనసాగిస్తామని వెల్లడించారు.
అయితే జూన్ 1 నుంచి రాష్ట్రంలో తక్కువ సేవలతో ప్రజా రవాణా ప్రారంభిస్తామని చెప్పారు పళనిస్వామి. కరోనా కేసులు అధికంగా నమోదవుతున్న చెన్నై, కాంచీపురం, తిరువళ్లూర్, చెంగల్పట్టు జిల్లాల్లో బస్సులకు అనుమతించబోమని స్పష్టం చేశారు ముఖ్యమంత్రి.
ఐటీ సంస్థలు, ఐటీ ఆధారిత సేవలందించే కంపెనీలు.. 20శాతం అంటే 40 మందికి మించకుండా ఉద్యోగులతో కార్యకలాపాలు నిర్వహించుకోవచ్చని తమిళనాడు ప్రభుత్వం ఆదేశాలు జారీచేసింది.
దేశంలో అత్యధికంగా కొవిడ్-19 కేసులు నమోదవుతున్న రాష్ట్రాల్లో తమిళనాడు రెండో స్థానం ఉంది. శనివారం ఒక్కరోజే 938 కొత్త కేసులు నమోదు కావడం వల్ల రాష్ట్రంలో మొత్తం వైరస్ బాధితుల సంఖ్య 21,184 చేరింది.
ఇదీ చూడండి: 'మై లైఫ్.. మై యోగా' బ్లాగ్ ద్వారా యోగా పోటీలు:మోదీ
