గులాబి రంగులో.. పైనాపిల్కు తామర రెబ్బలు అతికించినట్టుగా అందంగా ఆకర్షిస్తుంది డ్రాగన్ ఫ్రూట్. సూపర్ మార్కెట్లలో, రోడ్లపై పండ్ల బండ్లలో ప్రత్యేకంగా ఆకట్టుకునే ఈ పండు చూడటానికే కాదు.. రుచితో మైమరపిస్తుంది కూడా. ఔషధ గుణాలతో ఆరోగ్యాన్నిస్తుంది. అయితే, ఇన్నాళ్లు ఇతర దేశాల నుంచి దిగుమతి చేసుకున్న ఈ విదేశీ పండు.. ఇప్పుడు స్వదేశీ పండు అయిపోయింది. డ్రాగన్ ఫ్రూట్ను మన నేలపైనే పండిస్తున్నారు కేరళకు చెందిన ఓ రైతు.
మలప్పురం జిల్లా వాట్టలూర్ గ్రామానికి చెందిన ఉమర్కుట్టి చాలాకాలం విదేశాల్లో పనిచేశాడు. ఫారిన్లో ఈ పండుకున్న డిమాండ్ను గమనించాడు. ఇందులో పోషకాలు పుష్కలంగా ఉన్నాయని తెలుసుకున్నాడు. విదేశాల నుంచి తిరిగొచ్చాక వ్యవసాయంపైనే దృష్టి పెట్టాడు. ఇతర ఫలాలు, పంటలతో పాటు.. కొంత భూమిలో డ్రాగన్ ఫ్రూట్ మొక్కలు నాటాడు.
జముడు జాతికి చెందిన ఈ డ్రాగన్ మొక్కలను సులభంగా సాగు చేయడం తెలుసుకుని.. శ్రద్ధగా పెంచాడు ఉమర్. పైగా ఎలాంటి రసాయనాలు వాడకుండా పంటను సాగు చేశాడు. ఉమర్ కృషి ఫలించింది. ఇన్నాళ్లు.... మెక్సికో, థాయ్లాండ్, ఇజ్రాయెల్, వియత్నాం, శ్రీలంక వంటి దేశాల్లో పండిన డ్రాగన్ ఫ్రూట్ను తెగ ఇష్టపడ్డ కేరళ వాసులు.. ఉమర్ కుట్టి పండించిన లోకల్ డ్రాగన్ ఫ్రూట్కు ఫిదా అయిపోతున్నారు. ఇప్పుడు బయట దొరికే హైబ్రీడ్ డ్రాగన్ ఫ్రూట్స్ కంటే.. ఉమర్ పండించిన సేంద్రియ డ్రాగన్ ఫ్రూట్కే డిమాండ్ ఎక్కువగా ఉంది.
