ఆమె తీసిన చిత్రాలు ఎంతో ప్రత్యేకమైనవి. ముఖ్యంగా పక్షులు గూళ్లు అల్లడం, వాటి వేట దృశ్యాలు ఆమె మనోహరంగా చిత్రీకరిస్తారు. అందుకే అభిమానులు ఆమెను 'యాక్షన్ ఫోటోగ్రాఫర్' అని పిలుచుకుంటారు. ఆమే రాధిక రామస్వామి. ఆమె ఇంటర్వ్యూ మీకోసం..
మీరు ఎలా వైల్డ్లైఫ్ ఫోటోగ్రాఫర్ అయ్యారు?
మా స్వస్థలం వెంకటాచలపురం, థేని. నాకు పదో తరగతి నుంచే ఫొటోగ్రఫీ మీద ఆసక్తి. ఆ రంగంపై ఉన్న అనురక్తే నన్ను ఈ స్థానంలో నిలబెట్టింది. మా నాన్నను కెమెరా కొనమని నేను అడిగేదాన్ని. మా కుటుంబం విహార యాత్రలకు వెళ్లేటప్పుడు పూలు, మొక్కలు, వన్యప్రాణులను చిత్రించాలనేది నా కోరిక అని చెప్పాను.
అపుడు మా నాన్న నాకు ఓ కెమెరా కొనిచ్చారు. అప్పటి నుంచి కెమెరాతో నా ప్రయాణం మొదలైంది. నేను దిల్లీలో ఉన్నప్పుడు డిజిటల్ కెమెరా వచ్చింది. దాంతో నేను దిల్లీలోని చారిత్రక కట్టడాలను చిత్రించేదాన్ని. వాటిని చూసి చాలా ఆనందించేదాన్ని. తరువాత పక్షులు, జంతువులను కెమెరాలో బంధించడం మొదలుపెట్టా. ఆ విధంగా ఫొటోగ్రఫీపై నా ప్రేమ మరింత ఎక్కువైంది.
మీ చిత్రాలు పాఠ్యపుస్తకాల్లో అచ్చు అయ్యాయని తెలిసినపుడు మీరు ఎలాంటి అనుభూతి పొందారు?
నా గురించి, నా విజయాల గురించి ప్రభుత్వ పాఠ్యపుస్తకాల్లో ప్రచురించడం నాకు చాలా గర్వకారణం. చాలా అంతర్జాతీయ పత్రికలు కూడా నా గురించి కథనాలు ప్రచురించాయి. నా పనికి గుర్తింపు రావడం... నాకు ఎంతో ఆనందం కలిగించే విషయం.
మీరు వైల్డ్లైఫ్ ఫొటోగ్రాఫర్ కావడంలో మీ కుటుంబ సభ్యుల పాత్ర ఏమిటి?
మా తల్లిదండ్రులు పాఠశాల ఉపాధ్యాయులు. మా నాన్న విశాల దృక్పథం, గుండె ధైర్యం నాలో ప్రతిబింబిస్తాయి. నాకు ఇంజనీరింగ్ అంటే చాలా ఇష్టం. ఇందుకు మా తల్లిదండ్రులు నన్ను బాగా ప్రోత్సహించారు. ఇప్పుడు వారు లేరు. అయితే వారి స్థానాన్ని నా భర్త తీసుకున్నారు. నన్ను చాలా ప్రోత్సహిస్తున్నారు. వారే లేకుంటే వైల్డ్లైఫ్ ఫోటోగ్రఫీలో నేను ఇంతటి విజయం సాధించగలిగేదాన్ని కాదు.
వైల్డ్లైఫ్ ఫోటోగ్రాఫర్ కావాలనుకునే వారికి మీ సలహా ఏమిటి?
వైల్డ్లైఫ్ ఫొటోగ్రఫీలో ప్రాథమిక విషయాలను పూర్తిగా అధ్యయనం చేయాలి. ఓపిక అనేది వీరికి చాలా అవసరం. కెమెరాలను, లెన్స్లను అద్దెకు తీసుకోవాలి. మనం ఎట్టి పరిస్థితుల్లోనూ వాటి జీవన విధానానికి భంగం కలిగించకూడదు. ఇదే భవిష్యత్ ఆశావహులకు నా సలహా.
అరణ్యాలపై, అక్కడి వన్యప్రాణులపై మీ అభిప్రాయమేమిటి?
నేను ఈ రంగంలో చాలా నేర్చుకున్నాను. వన్యప్రాణులు అటవీ జీవనవిధానంలో అంతర్భాగం. మన స్వార్థం కోసం చెట్లను నరికివేస్తున్నాం. కానీ వాటి స్థానంలో మొక్కలను నాటడం లేదు. అందువల్లే వర్షాలు సకాలంలో పడడం లేదు. మనం ప్రకృతి నుంచి పొందినదాన్ని తిరిగి ప్రకృతికి చెల్లించాల్సి ఉంది.
ఇదీ చూడండి: సర్వం 'యోగా'మయం: ఘనంగా వేడుకలు
