మధ్యప్రదేశ్లో అధికార కాంగ్రెస్ పార్టీకి చెందిన 22 మంది రెబల్ ఎమ్మెల్యేలకు రాష్ట్ర శాసనసభ స్పీకర్ ఎన్పీ ప్రజాపతి నోటీసులు జారీ చేశారు. శుక్రవారం లోపు తన ముందు హాజరుకావాలని ఆదేశించారు. తమ పదవికి స్వచ్ఛందంగా రాజీనామాలు చేశారా, లేక ఎవరి ఒత్తిడి వల్లనైనా ఈ విధంగా చేశారా అనే అంశంపై స్పష్టత ఇవ్వాలని కోరారు.
భాజపా వ్యూహాలకు పదును...
ప్రతిపక్ష భాజపా అధికార పార్టీ తన బలాన్ని నిరూపించుకోవాలని డిమాండ్ చేస్తోంది. ఈనెల 16న విశ్వాస పరీక్ష నిర్వహించాలని స్పీకర్ను కోరనున్నట్లు పార్టీ వర్గాలు తెలిపాయి.
"ప్రస్తుతం ప్రభుత్వం మైనారిటీలో పడింది. ఈనెల 16న రాష్ట్ర బడ్జెట్ సమావేశాలు ప్రారంభం కానున్న సందర్భంగా అదే రోజు బలపరీక్ష నిర్వహించాలని రాష్ట్ర గవర్నర్, అసెంబ్లీ స్పీకర్ను కోరనున్నాం. గవర్నర్, స్పీకర్ వద్ద 22 మంది ఎమ్మెల్యేల రాజీనామాలు ఉన్నాయి. ఏమి నిర్ణయం తీసుకుంటారనేది వారి ఇష్టం."
- నరోత్తమ్ మిశ్రా, భాజపా విప్.
22 మంది ఎమ్మెల్యేల రాజీనామాలపై తుది నిర్ణయం వెలువడిన తర్వాత విశ్వాస పరీక్ష ఎదుర్కొనేందుకు సిద్ధమని కాంగ్రెస్ స్పష్టం చేసింది.
స్పీకర్ నిర్ణయంపైనే ఆధారం..
15 నెలల కమల్నాథ్ ప్రభుత్వం.. 22 మంది ఎమ్మెల్యేల రాజీనామాలతో సంక్షోభంలో పడింది. పార్టీ నేత జోతిరాదిత్య సింధియా కాంగ్రెస్కు రాజీనామా చేసి భాజపా తీర్థం పుచ్చుకున్నారు. ఆయనతో పాటు ఎమ్మెల్యేలు కాషాయ పార్టీలోకి వెళ్తారని అనుకున్నప్పటికీ అలా జరగలేదు.
230 సీట్లున్న మధ్యప్రదేశ్ అసెంబ్లీలో ప్రస్తుతం 228 మంది సభ్యులు ఉన్నారు. ప్రభుత్వానికి మద్దతుగా కాంగ్రెస్ 114, నలుగురు స్వతంత్రులు, ఇద్దరు బీఎస్పీ, ఒకరు ఎస్పీ సభ్యుల బలం ఉంది. భాజపాకు 107 స్థానాలు ఉన్నాయి. అయితే 22 మంది ఎమ్మెల్యేల రాజీనామాలు ఆమోదం పొందితే.. కాంగ్రెస్ బలం 92 స్థానాలకు పడిపోయి ప్రభుత్వం మైనారిటీలో పడుతుంది.
ఇదీ చూడండి: కమల్నాథ్ సర్కార్ భవితవ్యం తేలేది ఆరోజే...
