'ఆ ఘనత భాజపా విద్వేష రాజకీయాలకు నిదర్శనం'

దేశ ఆర్థిక వ్యవస్థకు సంబంధించి మోదీ సర్కార్​పై మరోమారు విమర్శలు గుప్పించారు కాంగ్రెస్​ అగ్రనేత రాహుల్​ గాంధీ. విద్వేషపూరిత రాజకీయాల వల్లే తలసరి జీడీపీ బంగ్లాదేశ్​తో సమాన స్థితికి చేరిందని దుయ్యబట్టారు.

తలసరి స్థూల జాతీయోత్పత్తిలో భారత్​కు దాదాపు సమానంగా బంగ్లాదేశ్​ వస్తోందన్న ఐఎమ్​ఎఫ్​ అంచనాలను ఆసరాగా చేసుకుని కేంద్రంపై ధ్వజమెత్తారు కాంగ్రెస్ నేత రాహుల్ గాంధీ. ఆరేళ్లలో సాధించిన ప్రగతి ఇదేనంటూ ట్విట్టర్​లో వ్యంగ్యాస్త్రాలు సంధించారు.

" జీడీపీలో త్వరలో భారత్​ను బంగ్లాదేశ్ అధిగమించనుంది. ఇది 6 సంవత్సరాల భాజపా విద్వేషపూరిత జాతీయవాద రాజకీయాల ఫలితమే."

----రాహుల్ గాంధీ, కాంగ్రెస్​ అగ్రనేత

ఐఎమ్​ఎఫ్​ ఏం చెప్పింది?

భారత ఆర్థిక వ్యవస్థపై ఐఎమ్​ఎఫ్​ పలు కీలక వ్యాఖ్యలు చేసింది. కరోనా మహమ్మారి కారణంగా దేశ ఆర్థిక రంగం కుదేలైందని పేర్కొంది. ఈ సంవత్సరం గణనీయంగా 10.3శాతం మేర ఆర్థిక వ్యవస్థ క్షీణిస్తుందని అంచనా వేసింది.

వచ్చే సంవత్సరంలో భారత ఆర్థిక వ్యవస్థ మళ్లీ పుంజుకునే అవకాశం ఉందని ఐఎమ్ఎఫ్​ పేర్కొంది. 8.8 శాతం వృద్ధి రేటు నమోదు కావచ్చని అంచనా వేసింది.

ఇదీ చదవండి :నిధుల కొరతతో కోమాలో దేశారోగ్యం