మహా మలుపుతో మరింత ఉత్కంఠగా మారిన మహారాష్ట్ర రాజకీయాలు సుప్రీంకోర్టు వద్దకు చేరాయి. ముఖ్యమంత్రి ఫడణవీస్ ప్రభుత్వ ఏర్పాటుకు వ్యతిరేకంగా కాంగ్రెస్-ఎన్సీపీ-శివసేన దాఖలు చేసిన పిటిషన్పై నేడు అత్యున్నత న్యాయస్థానం అత్యవసర విచారణ చేపట్టనుంది. జస్టిస్ రమణ, జస్టిస్ అశోక్ భూషణ్, జస్టిస్ సంజీవ్ ఖన్నాలతో కూడిన ధర్మాసనం ఈరోజు ఉదయం 11 గంటల 30 నిమిషాలకు ఈ కేసును విచారించనుంది.
ప్రభుత్వ ఏర్పాటుకు కాంగ్రెస్-ఎన్సీపీ-శివసేన సిద్ధమవుతున్న వేళ.. శనివారం ఉదయం మహారాష్ట్ర ముఖ్యమంత్రిగా దేవంద్ర ఫడణవీస్.. ఉపముఖ్యమంత్రిగా ఎన్సీపీ నేత అజిత్ పవార్ ప్రమాణస్వీకారం చేశారు. రాష్ట్ర ప్రజలకు సుస్థిర పాలనను అందిస్తామని ఫడణవీస్ ధీమా వ్యక్తం చేశారు.
అయితే మెజారిటీ లేని ఫడణవీస్ ప్రభుత్వ ఏర్పాటుకు తీసుకున్న నిర్ణయం ఏకపక్షం, రాజ్యాంగ విరుద్ధం, చట్టవిరుద్ధమని ప్రకటించాలంటూ సర్వోన్నత న్యాయస్థానంలో వ్యాజ్యం దాఖలు చేశాయి మూడు పార్టీలు. కూటమి నేత ఉద్ధవ్ ఠాక్రే నేతృత్వంలో ప్రభుత్వ ఏర్పాటుకు అహ్వానించేలా గవర్నర్కు ఆదేశాలు ఇవ్వాలని పిటిషన్లో పేర్కొన్నాయి. చట్ట వ్యతిరేక కార్యకలాపాలను నివారించేందుకు వీలుగా 24 గంటల్లోపు విశ్వాస పరీక్ష జరిగేలా ఆదేశించాలని కోర్టును అభ్యర్థించాయి.
ముంబయి హోటళ్లల్లో రాజకీయాలు...
ఫడణవీస్ చేత ప్రమాణ స్వీకారం చేయించిన గవర్నర్ భగత్ సింగ్ కోశ్యారీ.. బల పరీక్షకు ఈ నెల 30 వరకు గడువునిచ్చారు. ఈ నేపథ్యంలో తమ ఎమ్మెల్యేలను ముంబయి హొటల్కు తరలించింది ఎన్సీపీ పార్టీ. బలపరీక్ష జరిగే వరకు ఎమ్మెల్యేలు అక్కడే ఉండనున్నారని సమాచారం.
ప్రభుత్వ ఏర్పాటులో భాజపాకు సహకరించి సంచలనం సృష్టించిన అజిత్ పవార్... శనివారం రాత్రి తన సోదరుడు శ్రీనివాస్ పవార్తో భేటీ అయ్యారు. వీరి మధ్య జరిగిన చర్చలపై స్పష్టత లేదు.
మరోవైపు.. అజిత్ పవార్ను పార్టీ శాసనసభాపక్ష నేత పదవి నుంచి తొలగించింది ఎన్సీపీ. ఆ బాధ్యతలను సీనియర్ నేత జయంత్ పాటిల్కు అప్పగించింది.
ఇదీ చూడండి:-
మహా చదరంగం: మోదీ-షా X శరద్ పవార్
