కరోనా లాక్డౌన్ నాటి నుంచి చాలా మంది ప్రజలు తమ ఉద్యోగాలు, ఆదాయాన్ని కోల్పోయారు. ఫలితంగా దేశవ్యాప్తంగా నిరుద్యోగం విజృంభించింది. అయితే, మధ్యప్రదేశ్లోని ఇందోర్కు చెందిన ముగ్గురు యువకులు.. ఉపాధి కోల్పోయామని విచారించలేదు. వారి కష్టాలను అవకాశంగా మార్చుకొని విజయం సాధించారు. స్వావలంబనకు చక్కటి ఉదాహరణగా నిలిచారు.
ఇందోర్కు చెందిన ముగ్గురు స్నేహితులు మేనేజ్మెంట్, ఇంజినీరింగ్ రంగాల్లో తమ ఉద్యోగాలు కోల్పోయారు. అయితే, అసాధారణ ఆలోచన వారి జీవితాన్ని మార్చేసింది. ఓ 20 సీట్లున్న బస్సుకు మరమ్మతులు చేసి రూఫ్టాప్ రెస్టారెంట్గా మార్చారు. ఇలా అద్దె ఖర్చులతో పాటు ఎక్కడైనా వ్యాపారం చేసుకునే సౌలభ్యం కలిగిందని రెస్టారెంట్ యజమాని వేదాంత శుక్లా ఈటీవీ భారత్తో చెప్పారు.
"మేం మా పనిలో మంచి నిపుణులమే అయినా.. లాక్డౌన్లో ఉద్యోగాలు కోల్పోయాం. మొదట బాధపడినా.. ప్రధాని మోదీ ఆత్మనిర్భర్ పిలుపుతో స్వయం సమృద్ధి సాధించాలని నిర్ణయించుకున్నాం. ఫుడ్ కోర్టు ప్రారంభించడానికి ఆర్థికంగా చాలా ఇబ్బందులు పడ్డాం. మా వద్ద ఉన్నంతలో ఈ రూఫ్టాప్ రెస్టారెంట్ను ప్రారంభించాం."
- వేదాంత శుక్లా, రెస్టారెంట్ యజమాని
కరోనా సంక్షోభంలో ఉపాధి కోల్పోయిన వారికి ఈ యువకుల కథ స్ఫూర్తినిస్తుందని పలువురు అభిప్రాయపడ్డారు.
ఇదీ చూడండి: చెప్పుకోలేక.. ఆపుకోలేక ఇబ్బంది పడుతున్నారా?
