అధికరణ 370 రద్దు, జమ్ముకశ్మీర్లో ఆంక్షలపై దాఖలైన పలు పిటిషన్లపై సుప్రీం కోర్టు విచారణ చేపట్టింది. ప్రభుత్వం తరఫున అటార్నీ జనరల్ కేకే వేణుగోపాల్, సొలిసిటర్ జనరల్ తుషార్ మెహతా వాదనలు వినిపించారు.
ఇల్తీజకు అనుమతి...
తన తల్లి ఆరోగ్యం సరిగా లేదని, చూడటానికి అనుమతివ్వాలంటూ జమ్ముకశ్మీర్ మాజీ ముఖ్యమంత్రి మెహబూబా ముఫ్తీ కుమార్తె ఇల్తీజ ముఫ్తీ దాఖలు చేసిన పిటిషన్పై విచారణ చేపట్టింది ధర్మాసనం. శ్రీనగర్ వెళ్లి ముఫ్తీని కలిసేందుకు ఇల్తీజకు అనుమతించింది. శ్రీనగర్‌లోని ఇంటికి కాకుండా ఇతర ప్రదేశాలకు వెళ్లాలంటే స్థానిక అధికారుల అనుమతి తీసుకోవాలని ఆదేశించింది.
తరిగమిని తరలించాలని ఆదేశం..
జమ్ముకశ్మీర్ సీపీఎం నేత మహ్మద్ యూసుఫ్ తరిగమి ఆరోగ్యం క్షీణించిందని, దిల్లీ ఎయిమ్స్కు తరలించాలని ఆ పార్టీ అగ్రనేత సీతారాం ఏచూరి దాఖలు చేసిన పిటిషన్పై విచారణ చేపట్టింది ధర్మాసనం. ఇటీవలే శ్రీనగర్కు వెళ్లి తరిగమిని కలిసి ఏచూరి... న్యాయస్థానానికి నివేదిక సమర్పించారు. ఈ నివేదిక ఆధారంగా తరిగమి ఆరోగ్యం ముఖ్యమని పేర్కొంది సుప్రీం. ఆయన్ను దిల్లీ ఎయిమ్స్కు తరలించాలని ఆదేశించింది. ఏచూరి నివేదికపై సమాధానమివ్వాలని కేంద్ర ప్రభుత్వానికి నోటీసులు జారీ చేసింది.
కశ్మీర్ టైమ్స్ ఎడిటర్ పిటిషన్పై వాదనలు...
జమ్ముకశ్మీర్ పరిస్థితులపై కశ్మీర్ టైమ్స్ ఎడిటర్ అనురాధ భాసిన్ వేసిన పిటిషన్పై విచారణ చేపట్టింది సుప్రీం ధర్మాసనం. అధికరణ 370 రద్దు చేసిన 30 రోజుల తర్వాత కూడా జర్నలిస్టులు కశ్మీర్లో స్వేచ్ఛగా తిరగలేకపోతున్నారని పిటిషనర్ తరఫు న్యాయవాది పేర్కొన్నారు. ఈ వ్యాఖ్యల్ని సొలిసిటర్ జనరల్ తోసిపుచ్చారు. భాసిన్ సహా ఇతర సంపాదకులు కావాలనే శ్రీనగర్ నుంచి వార్తా పత్రిక ప్రచురించడంలేదని వాదించారు. జమ్ము, కశ్మీర్, లద్దాఖ్ నుంచి వార్తా పత్రికలు ఎప్పటిలానే ప్రచురితమవుతున్నాయని కోర్టుకు నివేదించారు.
ఈ సందర్భంగా కశ్మీర్లో క్రమక్రమంగా ఆంక్షలు సడలిస్తున్నట్లు అటార్నీ జనరల్ కేకే వేణుగోపాల్ న్యాయస్థానానికి తెలిపారు.
తెహసీన్ పిటిషన్ తిరస్కరణ..
కశ్మీర్లో సాధారణ పరిస్థితులు నెలకొల్పేలా ఆదేశించాలని తెహసీన్ పూనావాలా వేసిన పిటిషన్ను సుప్రీంకోర్టు తిరస్కరించింది. కశ్మీర్కు ఎలాంటి సంబంధం లేనివారు పిటిషన్ వేయటం సరికాదని అభిప్రాయపడింది.
కశ్మీర్కు సంబంధించిన పిటిషన్లపై వాదనలను ఈనెల 16కు వాయిదా వేసింది సుప్రీంకోర్టు.
ఇదీ చూడండి: కశ్మీర్ జనాభా లెక్కింపునకు సమన్వయ కమిటీ
