భోపాల్ భాజపా లోక్సభ అభ్యర్థి, మాలేగావ్‌ పేలుళ్ల కేసు నిందితురాలు స్వాధ్వి ప్రజ్ఞాసింగ్ ఠాకూర్ మరో వివాదంలో చిక్కుకున్నారు. జాతిపిత మహాత్మాగాంధీని చంపిన నాథూరామ్ గాడ్సేను ఉద్దేశించి అనుచిత వ్యాఖ్యలు చేశారు. సినీ నటుడు, మక్కల్ నీది మయ్యమ్ అధినేత కమల్హాసన్ వ్యాఖ్యలపై సాధ్వి ఇలా స్పందించారు.
"గాడ్సే దేశభక్తుడు. ఎప్పటికీ దేశభక్తుడే. తనను ఉగ్రవాది అన్న వారు ముందు వాళ్ల గురించి ఆలోచించుకోవాలి. ఈ ఎన్నికల్లో ప్రజలు వారికి తగిన గుణపాఠం చెబుతారు."
-సాధ్వి ప్రజ్ఞా సింగ్ ఠాకూర్, భాజపా నేత
ప్రజ్ఞాసింగ్ వ్యాఖ్యలను భాజపా ఖండించింది.
"మహాత్మాగాంధీ పట్ల ఆమె వ్యాఖ్యలతో మేం పూర్తిగా విభేదిస్తున్నాం. తీవ్రంగా ఖండిస్తున్నాం. పార్టీ ఆమె అలా ఎందుకు మాట్లాడారో వివరణ కోరుతుంది. ఆమె అభ్యంతరకర వ్యాఖ్యలపై వెంటనే బహిరంగంగా క్షమాపణలు చెప్పాలి."
-జీవీఎల్ నరసింహరావు, భాజపా అధికార ప్రతినిధి
భాజపా అధినాయకత్వం ఒత్తిడితో కొద్ది గంటల వ్యవధిలోనే క్షమాపణ చెప్పారు సాధ్వి.
కొత్త కాదు...
దిగ్విజయ్ సింగ్పై లోక్సభ ఎన్నికల బరిలో దిగినప్పటి నుంచి ప్రజ్ఞా సింగ్ వివాదాస్పద వ్యాఖ్యలతో భాజపాను ఇరకాటంలో పడేస్తున్నారు. ముంబయి ఉగ్రదాడిలో అమరుడైన ఐపీఎస్ హేమంత్ కర్కరేపైనా ఇదే తరహా వ్యాఖ్యలు చేశారు. చివరకు పార్టీ ఒత్తిడితో వాటిని ఉపసంహరించుకున్నారు.
