భారత్కు భద్రతామండలి శాశ్వత సభ్యత్వం కల్పించే అంశమై ఇప్పటివరకు మద్దతు ఇస్తూ వస్తోన్న రష్యా.. ఇకముందు ఈ దిశగా సహకారం కొనసాగిస్తామని ప్రకటించింది. ఈ మేరకు రష్యా విదేశాంగ మంత్రి సెర్గీ లావరోవ్ ప్రకటించారు. భారత్, రష్యా, చైనా త్రైపాక్షిక భేటీలో భాగంగా ఈ విషయాన్ని తెలిపారు లావరోవ్. శాశ్వత సభ్యత్వానికి భారత్ బలమైన పోటీదారు అని పేర్కొన్నారు. భారత్.. భద్రతా మండలి శాశ్వత సభ్య దేశంగా అవతరిస్తుందని తమకు నమ్మకం ఉందని ఉద్ఘాటించారు.
'భారత్, చైనాకు బయటి శక్తుల సాయం అనవసరం'
అంతర్గత వ్యవహారాలు సహా ఇతర అంశాల్లో భారత్- చైనాలకు బయటి శక్తుల సాయం అనవసరమని భావిస్తున్నట్లు చెప్పారు లావరోవ్. సరిహద్దు సహా వివిధ సమస్యలను భారత్- చైనాలు ద్వైపాక్షికంగా, శాంతియుతంగానే పరిష్కరించుకుంటాయని భావిస్తున్నట్లు పేర్కొన్నారు. రక్షణ అధికారులు, విదేశాంగమంత్రుల స్థాయిలో ఇప్పటికే చర్చలు ప్రారంభించాయని గుర్తు చేశారు.
ఇదీ నేపథ్యం..
ఐక్యరాజ్యసమితి భద్రతామండలి శాశ్వత సభ్యత్వం సాధించడం.. పలు సంవత్సరాలుగా భారత్కు నెరవేరని లక్ష్యంగా పరిణమిస్తూ వస్తోంది. అమెరికా, బ్రిటన్, ఫ్రాన్స్, చైనా, రష్యాలు ఇప్పటివరకు శాశ్వత సభ్యదేశాలుగా ఉన్నాయి. ఏదైనా దేశానికి శాశ్వత హోదా ఇవ్వాలంటే సభ్యదేశాలన్నింటి అంగీకారం ఉండాలన్న నిబంధనను అడ్డం పెట్టుకుని.. భారత ప్రవేశానికి చైనా మోకాలడ్డుతోంది.
ఇదీ చూడండి: చైనా మంత్రి ఎదుటే డ్రాగన్పై జైశంకర్ పంచ్!
