కాలం విడదీసిన తల్లీపిల్లలను కన్నప్రేమ కలిపింది

తమిళనాడుకు చెందిన ఓ మహిళ మతిస్తిమితం సరిగాలేక 14 ఏళ్ల క్రితం ఇంటికి దూరమైంది. రాష్ట్రం కాని రాష్ట్రంలో తినీ తినక, ఫుట్​పాత్​లపై నిద్రించి అవస్థలు పడి చివరకు మంగుళూరులోని ఓ పునరావాస కేంద్రానికి చేరుకుంది. ఇన్నేళ్ల తర్వాత ఆ తల్లిని వారి పిల్లలు కలుసుకున్నారు. ఆనందంతో కన్నీళ్లు పెట్టుకున్నారు.

మనం ఇంటికి వెళ్లగానే అమ్మ ఒక్క క్షణం కనిపించకపోతేనే కంగారు​ పడతాం. నిద్రలోంచి లేవగానే అమ్మా.. అమ్మా అంటూ దగ్గరికి వెళతాం. ఆ మాతృమూర్తి ఒక్కసారి కనిపించకపోతేనే పిల్లలు పడే బాధ అంతా ఇంతా కాదు. అలాంటిది కనిపించకుండా పోయిన తల్లిని 14ఏళ్ల తర్వాత చూసిన ఇద్దరు తమిళనాడు వాసుల సంతోషం వర్ణనాతీతం.

14 ఏళ్ల క్రితం

తమిళనాడు కోర్తంపేట్​కు చెందిన మేరీ అనే మహిళ 14 ఏళ్ల క్రితం మానసిక స్థితి సరిగ్గా లేకపోవడం వల్ల ఇల్లు విడిచి వెళ్లిపోయింది. అప్పటికే ఆమెకు 9 నెలల పసిపాప సహా ఇద్దరు చిన్న పిల్లలు ఉన్నారు. ఆమె భర్త తన కోసం ఏడాదిపాటు వెతికి ఆశలతో పాటు ప్రాణాలను వదిలేశాడు.

తినీ తినక, ఫుట్​పాత్​లపై

తినీ తినక, ఫుట్​పాత్​లపై నిద్రించి అవస్థలు పడుతూ నాలుగేళ్లపాటు గడిపింది మేరీ. తర్వాత మంగుళూరు మరోలిలోని వైట్​ హౌస్​ పునరావాస కేంద్రం వారి కంటపడింది. వారు ఆమెను చేరదేసి బాగోగులు చూసుకుని చికిత్స చేయించారు.

ఓ డాక్టర్​ చొరవతో

తమిళనాడు కోర్తంపేట్​కు​ చెందిన ఓ వైద్యుడు మంగుళూరులోని ఈ పునరావాస కేంద్రాన్ని సందర్శించగా మేరీ వివరాలు తెలిశాయి. ఆ వివరాలను కోర్తంపేట్​ స్థానిక చర్చిలోని తన మిత్రుడైన ఫాదర్​కు అందించాడు. ప్రార్థనా సమయంలో చర్చి ఫాదర్​ మేరీ వివరాలను బహిర్గతం చేయగా ఆ సమాచారం ఆమె పిల్లలకు చేరింది. వెంటనే వారు హుటాహుటిన మంగుళూరులోని పునరావాస కేంద్రానికి చేరుకుని తమ తల్లిని కలుసుకున్నారు.

ఇదీ చూడండి: ప్లాస్టిక్​ బాటిళ్లతో సుందరమైన శ్వేత ఏనుగు!