మహారాష్ట్రలో నవంబర్ 22న జరుగనున్న నాసిక్ మేయర్ ఎన్నికలకు భాజపా, శివసేన సన్నద్ధమవుతున్నాయి. మేయర్, డిప్యూటీ మేయర్ పదవుల కోసం తమ అభ్యర్థులను రంగంలోకి దింపాయి. కాంగ్రెస్, ఎన్సీపీ, శివసేన కలిసి ప్రభుత్వ ఏర్పాటుకు సన్నద్ధమవుతున్న నేపథ్యంలో నాసిక్ మున్సిపల్ ఎన్నికలు రావడం తీవ్ర ఆసక్తిని రేకిత్తిస్తోంది.
రిసార్టు రాజకీయాలు
నాసిక్ మున్సిపల్ కార్పొరేషన్లో భాజపాకు మెజారిటీ ఉంది. అయితే ముందు జాగ్రత్తగా తమ పార్టీకి చెందిన 65 మంది కార్పొరేటర్లలో 48 మందిని లోనావాలాలోని ఓ రిసార్టుకు తరలించింది.
మరోవైపు శివసేన కూడా తన 34 మంది కార్పొరేటర్లను ముంబయి సమీపంలోని దహను రిసార్టులో ఉంచింది.
నాసిక్ మన్సిపాలిటీ
120 మంది సభ్యుల నాసిక్ మున్సిపాలిటీలో భాజపాకు - 65, శివసేనకు- 34, ఎన్సీపీకి- 6, ఆర్పీఐకి- 1, ఎమ్ఎన్ఎస్కి- ఐదుగురు కార్పొరేటర్లు ఉన్నారు.
ప్రస్తుత మేయర్ రంజనా భన్సీ పదవీకాలం సెప్టెంబర్ 15తోనే ముగిసిపోయింది. అయితే అసెంబ్లీ ఎన్నికల ప్రవర్తనా నియమావళి అమలులో ఉన్నందున వారి పదవీ కాలాన్ని డిసెంబర్ 15 వరకు పొడిగించారు.
'మహా' రాజకీయం
ముఖ్యమంత్రి పీఠం కోసం భాజపా, శివసేన మధ్య విబేధాలు రావడం, ప్రభుత్వ ఏర్పాటుకు ఏ పార్టీకి సరైన మెజారిటీ లేని కారణంగా మహారాష్ట్రలో రాష్ట్రపతిపాలన కొనసాగుతోంది. అయితే కాంగ్రెస్, ఎన్సీపీలతో కలిసి ప్రభుత్వం ఏర్పాటు చేయడానికి శివసేన ప్రయత్నాలు ముమ్మరం చేసింది.
భాజపా బేరసారాలు
శివసేన-ఎన్సీపీ ప్రభుత్వం ఆరు నెలలు కూడా మనలేదని మాజీ ముఖ్యమంత్రి దేవేంద్ర ఫడణనీస్ వ్యాఖ్యానించారు. మరోవైపు త్వరలోనే మహారాష్ట్రలో భాజపా ప్రభుత్వం ఏర్పాటుచేస్తామని ఆ పార్టీ రాష్ట్ర అధ్యక్షుడు చంద్రకాంత్ పాటిల్ ప్రకటించారు. భాజపా నేతల ప్రకటనలు చూస్తుంటే.. ఎమ్మెల్యేల కొనుగోలుకు కాషాయం పార్టీ సన్నద్ధం అవుతున్నట్లు సందేహాలు కలుగుతున్నాయని శివసేన ఆరోపించింది.
ఇదీ చూడండి: గవర్నర్తో ఎన్సీపీ, కాంగ్రెస్, సేన నేతల భేటీ వాయిదా
