హరియాణా శాసనసభ ఎన్నికలకు ఇంకా రెండు వారాలే సమయం ఉంది. ఇంత తక్కువ సమయంలో ఎన్నికల ప్రచార వ్యూహాలపై దృష్టి నిలపాల్సిన వేళ అన్ని పార్టీల్లోనూ అసమ్మతి సెగలు రేగుతున్నాయి. అసంతృప్తుల బెడదతో ఆయా పార్టీల అధినాయకత్వం ఆందోళన చెందుతోంది.
అసమ్మతి... స్వతంత్రంగా మారే
టికెట్లు దక్కనివాళ్లు బాహాటంగానే తిరుగుబాటు బావుటా ఎగురేస్తున్న నేపథ్యంలో రెబల్స్‌ను దారికి తెచ్చుకోవడంపై పార్టీ ముఖ్యనేతలు దృష్టిసారించారు. మొత్తం 90 స్థానాలున్న హరియాణా శాసనసభ ఎన్నికలు అక్టోబర్ 21న జరగనున్నాయి. నామపత్రాల దాఖలు ఇప్పటికే ముగియగా టికెట్లు దక్కని నాయకులు రెబల్స్‌గా బరిలో దిగుతున్నారు. అధికార భాజపాతో పాటు ప్రతిపక్ష కాంగ్రెస్‌కూ ఈ చికాకులు తప్పడం లేదు. నామినేషన్ల ఉపసంహరణకు అక్టోబర్ 7 తుదిగడువు. అసమ్మతి నేతలు వెనక్కి తగ్గే సూచనలు కనిపించట్లేదు. ఫలితంగా ఎన్నికల్లో ఇబ్బందులు తప్పవన్న ఆందోళన అన్ని పార్టీల్లో నెలకొంది.
'విశ్వాసంతో పనిచేశా.. సీటు దక్కలేదు'
రేవారి నియోజకవర్గంలో సిట్టింగ్ ఎమ్మెల్యే రణ్‌ధీర్‌ కాప్రివాస్‌ను కాదని సునిల్‌ ముస్పూర్‌కు భాజపా టికెట్ కేటాయించింది. టికెట్ దక్కని రణ్‌ధీర్‌ స్వతంత్ర అభ్యర్థిగా బరిలో నిలిచారు. తాను పార్టీకి విశ్వాసంగా పనిచేశానని.. పార్టీ వ్యతిరేక కార్యక్రమాల్లో ఎన్నడూ పాల్గొనని తనకు టికెట్ ఎందుకు కేటాయించలేదో తెలియదని ఆయన వాపోయారు. మద్దతుదారుల ఒత్తిళ్ల మేరకే తప్పనిసరి పరిస్థితుల్లో స్వతంత్ర అభ్యర్థిగా బరిలో దిగుతున్నానని తెలిపారు.
'ఖట్టర్తో కటీఫే కారణం..'
గురుగ్రామ్ నుంచి భాజపా సిట్టింగ్ ఎమ్మెల్యే ఉమేశ్ అగర్వాల్‌ తన భార్యను స్వతంత్ర అభ్యర్థిగా బరిలో నిలిపారు. ముఖ్యమంత్రి మనోహర్‌ లాల్‌ ఖట్టర్, ఉమేష్‌ అగర్వాల్‌ మధ్య సంబంధాలు సరిగా లేనందునే ఆయనకు టికెట్ దక్కలేదని పార్టీ వర్గాలు వెల్లడించాయి.
'సీనియర్లను కాదని ఇచ్చారు..'
హరియాణా అసెంబ్లీలో ప్రస్తుతం 48 మంది సభ్యులున్న భాజపా 12 మంది సిట్టింగ్‌లకు టికెట్లు నిరాకరించింది. ఇందులో ఇద్దరు మంత్రులు కూడా ఉన్నారు. ఇటీవల పార్టీలో చేరిన వారికి టికెట్లు కేటాయించి తమకు నిరాకరించడం కూడా అసమ్మతి నేతల ఆగ్రహానికి కారణంగా కనిపిస్తోంది.
పీసీసీ మాజీ అధ్యక్షుడికే మొండిచెయ్యి
ప్రతిపక్ష కాంగ్రెస్‌కూ ఈ ఇబ్బందులు తప్పడం లేదు. కాంగ్రెస్‌ టికెట్ దక్కని హరియాణా పీసీసీ మాజీ అధ్యక్షుడు అశోక్ తన్వార్‌ ఏకంగా దిల్లీలోని పార్టీ అధ్యక్షురాలు సోనియా గాంధీ ఇంటి ముందు నిరసన చేపట్టారు. టికెట్ కేటాయింపుల్లో అవినీతి జరిగిందని ఆరోపిస్తూ పార్టీ ప్రాథమిక సభ్యత్వంతో పాటు అన్ని పదవులకూ రాజీనామా చేశారు. ఎన్నికలకు కొన్ని రోజుల ముందే తన్వర్‌ను తప్పించిన అధినాయకత్వం కాంగ్రెస్‌ హరియాణా అధ్యక్ష పదవిని కుమారీ షెల్జాకు కట్టబెట్టింది.
చౌతాలాకూ చెయ్యిచ్చారు..
మాజీ ఉప ప్రధాని దేవీ లాల్‌ కుమారుడు, కాంగ్రెస్‌ నేత రంజిత్‌ సింగ్ చౌతాలాకి టికెట్ దక్కలేదు. అందుకే ఆయన రానియా స్థానం నుంచి రెబల్‌గా నిలిచారు. మాజీమంత్రి అజయ్సింగ్ యాదవ్ తన కుమారుడు చిరంజీవ్‌ రావ్‌కు రేవారి టికెట్ ఇవ్వలేదని అసంతృప్తి వ్యక్తం చేస్తున్నారు.
ఇదీ చూడండి: జాతీయ యుద్ధ స్మారకంపై స్క్వాడ్రన్ లీడర్ రవిఖన్నా పేరు
