ఉత్తర్ప్రదేశ్ అయోధ్యలో నిర్మించబోయే రామాలయం ఎత్తు 161 అడుగులు ఉండాలని నిర్ణయించింది శ్రీ రామ జన్మభూమి తీర్థక్షేత్ర ట్రస్టు. 5 గోపురాలు ఉండాలని ఖరారు చేసింది. ట్రస్టు అధ్యక్షుడు మహంత్ నృత్యగోపాల్ నేతృత్వంలో జరిగిన సమావేశంలో సభ్యులందరూ ఈ మేరకు నిర్ణయం తీసుకున్నారు.
ట్రస్టు సభ్యులందరూ హాజరైన ఈ భేటీలో రామ మందిర నమూనా(డిజైన్) గురించి కూడా చర్చించారు. ఆలయ నిర్మాణ భూమి పూజ కార్యక్రమాన్ని ఆగస్టు 5న ప్రధాని నరేంద్ర మోదీ చేతుల మీదుగా ప్రారంభిస్తామని ట్రస్టు తెలిపింది.
విశ్వహిందూ పరిషత్ ప్రతిపాదన మేరకు రామ మందిర నమూనాను ఖరారు చేశారు. ఎత్తు, వెడల్పు మాత్రం పెంచారు. నిర్మాణ పనులు మూడున్నర ఏళ్ల పాటు జరగనున్నాయి. ఇప్పటికే ప్రారంభం కావాల్సిన ఈ పనులు కరోనా పరిస్థితుల కారణంగా ఆలస్యమయ్యాయి.
