జాతీయ వైద్య కమిషన్ బిల్లుకు పార్లమెంటు ఆమోదం

రాజ్యసభలో జాతీయ వైద్య కమిషన్ బిల్లు(ఎన్​ఎంసీ)కు ఆమోదం లభించింది. కేంద్ర వైద్యశాఖ మంత్రి హర్షవర్ధన్ సభలో బిల్లును ప్రవేశపెట్టారు. పలు నిబంధనలపై విపక్షాల అభ్యంతరాల నడుమ బిల్లు ఎగువసభలో ఆమోదం పొందింది.

జాతీయ వైద్య కమిషన్ బిల్లు(ఎన్​ఎంసీ)కు వ్యతిరేకంగా దేశవ్యాప్తంగా ఆందోళనలు కొనసాగుతున్న వేళ.. బిల్లుకు రాజ్యసభ ఆమోదం లభించింది. ఈ బిల్లు ఇప్పటికే లోక్​సభలో ఆమోదం పొందింది. రాష్ట్రపతి ఆమోద ముద్ర అనంతరం చట్టరూపం దాల్చనుంది.

సవరణలు కోరిన విపక్షాలు

ఎన్​ఎంసీ బిల్లులో సవరణలు చేయాలని కాంగ్రెస్, సమాజ్‌వాదీ పార్టీలు డిమాండ్ చేశాయి. బిల్లులో మూడున్నర లక్షల మంది అర్హతలేని వ్యక్తులను ఆధునిక వైద్య అభ్యాసానికి అనుమతించేలా ఉన్న నిబంధనను తొలగించాలన్నాయి.

సభలో విపక్షాల ఆందోళన నడుమే బిల్లుకు ఆమోదం లభించింది.