రాజ్యసభ 250వ సమావేశం తొలిరోజు ఆ సభ మార్షల్స్ సరికొత్త వస్త్రధారణలో కనిపించి సభలో సభ్యులను ఆశ్చర్యానికి గురిచేశారు. ఎప్పటిలా తలపాగాలతో కూడిన భారతీయ సంప్రదాయ దుస్తుల్లో కాకుండా.. సైనిక తరహా దుస్తుల్లో కనిపించారు.
ఎప్పటి నుంచో ఉన్న సంప్రదాయం ప్రకారం ఛైర్మన్ పక్కన ఇద్దరు మార్షల్స్ ఉంటారు. సభ కార్యకలాపాలను ప్రారంభించే సమయంలో ఛైర్మన్ ముందు కవాతు నిర్వహిస్తారు. ఆర్డర్ పేపర్లను తీసుకురావడం వంటి పనుల్లో సహాయం చేస్తారు.
ఈరోజు సంస్మరణ తీర్మానాలు చేస్తున్న క్రమంలో.. ఛైర్మన్ కుర్చీ వద్ద ఉన్నది రాజ్యసభ మార్షల్సేనా అని ఓ సభ్యుడు ప్రశ్నించారు. దీనికి ఛైర్మన్ వెంకయ్య నాయుడు అవును అని సమాధానం ఇచ్చారు.
సైనిక దుస్తులకు భిన్నంగా..
కొత్త యూనిఫాం ఆలివ్ గ్రీన్ రంగులో ఉన్నప్పటికీ.. ఇది సైనిక సిబ్బంది ధరించే వాటికి భిన్నంగా ఉంది. పసిడి రంగు వర్ణంతో కూడిన అల్లిన తాడును అలంకారం కోసం వినియోగించారు.
సీజన్ల వారీగా..
రాజ్యసభ మార్షల్స్ వస్త్రధారణ గతంలో సీజన్ల వారీగా ఉండేది. వేసవి కాలంలో సఫారీ సూట్లు, శీతకాలంలో తలపాగాలతో కూడిన భారతీయ సంప్రదాయ దుస్తులను ధరించేవారు.
ఇదీ చూడండి: రోడ్డుపై 'ట్రాఫిక్ నియమాల డ్యాన్స్' చూశారా?
