పరీక్షలు రద్దు చేయండి ప్లీజ్: రాహుల్​

విద్యార్థుల పరీక్షలు రద్దు చేసి.. గత పరీక్షల్లో వారి ప్రదర్శనను బట్టి అందరినీ పాస్​ చేయాలని యూజీసీని కోరారు... కాంగ్రెస్​ ముఖ్యనేత రాహుల్​ గాంధీ. దేశంలో ఐఐటీ వంటి ఎన్నో విద్యాసంస్థలు పరీక్షలు రద్దు చేశాయి.. కానీ, యూజీసీ మాత్రం విద్యార్థులను అయోమయంలో పడేస్తోందని మండిపడ్డారు. కరోనా కాలంలో పరీక్షలు నిర్వహించాలనుకోవడం న్యాయంగా లేదని అభిప్రాయపడ్డారు.

కరోనా కాలంలో యూనివర్సిటీ గ్రాంట్స్​ కమిషన్​(యూజీసీ) విద్యార్థులకు పరీక్షలు నిర్వహించకూడదని డిమాండ్​ చేశారు కాంగ్రెస్​ నేత రాహుల్​ గాంధీ. సామాజిక మాధ్యమాల్లో కాంగ్రెస్ పార్టీ చేపట్టిన '#స్పీక్​ అప్​ ఫర్​ స్టూడెంట్స్​' ప్రచారంలో భాగంగా రాహుల్​ ఓ వీడియో విడుదల చేశారు.

"కరోనా ప్రజలకు తీవ్రంగా హాని కలిగిస్తోంది. ఇప్పటికే ఎందరో విద్యార్థులు ఈ మహమ్మారి వల్ల ఇబ్బందులు ఎదుర్కొంటున్నారు. ఐఐటీ సహా ఇతర కళాశాలల్లో పరీక్షలు రద్దు చేసి విద్యార్థులను పై తరగతులకు పంపుతున్నారు. కానీ యూజీసీ మాత్రం విద్యార్థులను అయోమయంలో పడేసింది. ఈ కరోనా కాలంలో పరీక్షలు నిర్వహించడం సబబు కాదు. పరీక్షలు రద్దు చేసి.. పూర్వ ఫలితాల ఆధారంగా వారిని పై తరుగతులకు పంపాలి."

- రాహుల్​ గాంధీ, కాంగ్రెస్​ నేత

సోషల్​ మీడియాలో అనేక మంది విద్యార్థులు కోరుతున్నట్లుగా... ఆరు నెలల పాటు కళాశాల ఫీజులు వసూలు చేయకూడదని... విద్యార్థుల రుణాలపై వడ్డీ రద్దు చేయాలని డిమాండ్​ చేశారు కేంద్ర​ మాజీ మంత్రి ఆనంద్​ శర్మ.

తాజాగా విద్యార్థులకు సెప్టెంబర్​లో పరీక్షలు నిర్వహించాలని నిర్ణయించింది యూజీసీ. అయితే, పరీక్షలకు హాజరు కాలేనివారు.. ప్రత్యేక పరీక్షలు నిర్వహించినప్పుడు రాసుకోవచ్చని స్పష్టతనిచ్చింది. ఈ మార్గదర్శకాలను కేంద్ర హోం, ఆరోగ్య మంత్రిత్వ శాఖలు ఆమోదించాయి.

ఇదీ చదవండి: సీఐసీఎస్​ఈ 10, 12వ తరగతి ఫలితాలు విడుదల