కాంగ్రెస్ నేత రాహుల్ గాంధీ పౌరసత్వ సవరణ చట్టానికి(సీఏఏ) వ్యతిరేకంగా ఇవాళ కేరళలోని తన సొంత నియోజకవర్గమైన వయనాడ్లో నిరసన ర్యాలీ చేపట్టనున్నారు. 'రాజ్యాంగాన్ని రక్షించండి' అనే నినాదంతో ఈ ర్యాలీ నిర్వహించనున్నారు.
జాతీయ అమరవీరుల దినోత్సవాన్ని పురస్కరించుకుని.. ఎస్కేఎంజే హైస్కూల్ నుంచి కాల్పెట్టలోని కొత్త బస్టాండ్ వరకు సుమారు రెండు కిలోమీటర్ల వరకు ఈ ర్యాలీ కొనసాగుతుందని పార్టీ వర్గాలు తెలిపాయి.
స్థానిక కాంగ్రెస్ ఎంపీలు, ఎమ్మెల్యేల ఆధ్వర్యంలో గత కొన్ని రోజులుగా కేరళ వ్యాప్తంగా సీఏఏకు వ్యతిరేకంగా నిరసనలు జరుగుతున్నాయి. కాగా నేడు రాహుల్గాంధీ స్వయంగా నిరసన ర్యాలీలో పాల్గొననున్నారు.
'సేవ్ ది కాన్స్టిట్యూషన్' మార్చ్...
యునైటెడ్ డెమోక్రటిక్ ఫ్రంట్(యూడీఎఫ్) ఆధ్వర్యంలో 13 జిల్లాల కాంగ్రెస్ నేతలు... వయనాడ్లో భారతదేశ చిత్రపటం ఆకారంలో మానవహారంగా ఏర్పడి నిరసన తెలపనున్నారు. కాంగ్రెస్ సీనియర్ నేతలు ఉమెన్ చాందీ, కేసీ వేణుగోపాల్, రమేశ్ చెన్నితాలా, కేపీసీసీ అధ్యక్షులు ముల్లపల్లి రామచంద్రన్ ఈ ర్యాలీలో పాల్గొననున్నారు.
కాగా కేరళ రాజధాని తిరువనంతపురంలో.. సీఏఏకు వ్యతిరేకంగా రూపొందించనున్న మానవహారంలో కాంగ్రెస్ వర్కింగ్ కమిటీ సభ్యుడు ఏకే ఆంటోని పాల్గొంటారు.
ఇదీ చదవండి: నిరసనకారులకు 'కారం'తో సామాన్యుడి జవాబు!
