కేంద్ర ప్రభుత్వం తీసుకొచ్చిన వ్యవసాయ సంస్కరణ చట్టాలను వ్యతిరేకిస్తూ పెద్ద ఎత్తున ఆందోళనలకు ప్రణాళిక చేస్తోంది కాంగ్రెస్. అందులో భాగంగానే పంజాబ్ నుంచి 'ఖేతీ బచావో (వ్యవసాయాన్ని రక్షించండి) యాత్ర'ను ఆదివారం ప్రారంభించనున్నారు కాంగ్రెస్ నేత రాహూల్ గాంధీ. పంజాబ్ నుంచి దిల్లీ వరకు 3 రోజుల పాటు సాగే ఈ యాత్రలో ట్రాక్టర్లతో ర్యాలీలు, రోడ్ షోలు సహా పలు కార్యక్రమాలు చేపట్టాలని నిర్ణయించారు.
యాత్ర ప్రారంభం సందర్భంగా మోగా జిల్లాలోని బధ్నికలాన్లో ఏర్పాటు చేసిన బహిరంగ సభలో పాల్గొంటారు రాహుల్ గాంధీ. అనంతరం పంజాబ్ ముఖ్యమంత్రి అమరీందర్ సింగ్ సహా ఇతర రాష్ట్ర సీనియర్ నేతలతో కలిసి యాత్రను ప్రారంభిస్తారు. ఆ తర్వాత బధ్నికలాన్ నుంచి జత్పురా వరకు ట్రాక్టర్ ర్యాలీకి నేతృత్వం వహిస్తారు. జత్పురాలో ఏర్పాటు చేసిన సమావేశంలో ప్రసంగించి.. యాత్ర తొలి రోజును ముగిస్తారు.
2 కోట్ల మంది రైతుల సంతకాలతో..
కేంద్ర ప్రభుత్వం తీసుకొచ్చిన చట్టాలకు వ్యతిరేకంగా దేశవ్యాప్తంగా నెల రోజుల పాటు ఆందోళనలు చేపట్టేందుకు ప్రణాళికలు రచించింది కాంగ్రెస్. కొన్ని కార్యక్రమాలను సెప్టెంబర్ 24నే ప్రారంభించింది. అవి నవంబర్ 14తో ముగియనున్నాయి. కాంగ్రెస్ చేపట్టే ఆందోళనలు చివరకు రెండు కోట్ల మంది రైతుల సంతకాలతో రాష్ట్రపతి రామ్నాథ్ కోవింద్కు మెమోరెండం ఇచ్చిన తర్వాత పూర్తవుతాయి.
ఇదీ చూడండి: కొత్త చట్టాలతో 'మద్దతు ధర'కు ఇక మంగళమేనా?
