కాంగ్రెస్ నేత రాహుల్గాంధీ.... తనపై దాఖలైన పరువునష్టం దావా విచారణ నిమిత్తం ఇవాళ గుజరాత్లోని అహ్మదాబాద్ మెట్రోపాలిటన్ మేజిస్ట్రేట్ కోర్టు ఎదుట హాజరుకానున్నారు.
రాహుల్గాంధీపై... అహ్మదాబాద్ జిల్లా కో ఆపరేటివ్ బ్యాంక్(ఏడీసీ) ఛైర్మన్ అజయ్ పటేల్ గతేడాది ఈ పరువునష్టం దావా వేశారు. ఈ కేసు విచారణ కోసం రాహుల్ నేడు స్వయంగా హాజరుకానుండగా, కాంగ్రెస్ జాతీయ అధికార ప్రతినిధి రణదీప్సింగ్ సుర్జేవాలా శనివారం విచారణకు హాజరవుతారని... గుజరాత్ కాంగ్రెస్ అధికార ప్రతినిధి మనీష్ దోషి తెలిపారు.
ఇదీ జరిగింది..
కాంగ్రెస్ మాజీ అధ్యక్షుడు రాహుల్ గాంధీ, ఆ పార్టీ అధికార ప్రతినిధి రణదీప్ సుర్జేవాలా గతంలో.. అహ్మదాబాద్ జిల్లా సహకార బ్యాంకుపై తీవ్ర ఆరోపణలు చేశారు. 2016 నవంబర్ 8న నోట్లరద్దు ప్రకటించిన ఐదు రోజుల్లో.... రూ.745.59 కోట్ల విలువైన చెల్లుబాటు అయ్యే నోట్లను మార్పిడి చేసి ఈ బ్యాంకు కుంభకోణానికి పాల్పడిందని ఆరోపించారు.
ముంబయికి చెందిన ఓ కార్యకర్త ఆర్టీఐ ద్వారా అడిగిన ప్రశ్నకు బ్యాంక్ ఫర్ అగ్రికల్చర్ అండ్ రూరల్ డెవలప్మెంట్ ఇచ్చిన సమాధానం ఆధారంగానే రాహుల్ గాంధీ, సుర్జేవాలా... ఏడీసీ బ్యాంకుపై ఆరోపణలు చేశారు.
అయితే ఈ ఆరోపణలను ఖండించిన ఏడీసీ బ్యాంకుతో పాటు ఛైర్మన్ అజయ్ పటేల్ వ్యక్తిగతంగా.... ఈ ఇరువురు నేతలపై పరువునష్టం కేసు దాఖలు చేశారు. కేంద్ర హోంమంత్రి అమిత్షా ఈ ఏడీసీ బ్యాంకు డైరెక్టర్లలో ఒకరు కావడం గమనార్హం.
ఈ కేసులో ప్రాథమిక సాక్ష్యాలను పరిశీలించిన న్యాయస్థానం ఏప్రిల్ 9న రాహుల్గాంధీ, రణ్దీప్ సుర్జేవాలాలకు సమన్లు జారీ చేసింది.
ఇదీ చూడండి: వైరల్: తుపాకీలో తూటాలు ఇలా నింపాలిరా చిన్నా
