వయనాడ్​ స్థానానికి రాహుల్​ నామినేషన్​

కాంగ్రెస్​ పార్టీ అధ్యక్షుడు రాహుల్​ గాంధీ కేరళలోని వయనాడ్​ లోక్​సభ స్థానానికి నామపత్రం దాఖలు చేశారు. భారీ జనసందోహం రాగా కోలాహలం నడుమ రాహుల్ దక్షిణాది నుంచి వయనాడ్​కు నామినేషన్ వేశారు.

కాంగ్రెస్​ పార్టీ అధ్యక్షుడు రాహుల్​ గాంధీ కేరళలోని వయనాడ్​ లోక్​సభ స్థానానికి నామినేషన్​ వేశారు. సోదరి ప్రియాంక గాంధీ, రాష్ట్ర పార్టీ వ్యవహారాల బాధ్యుడు ముకుల్ వాస్నిక్, సీనియర్​ నేత కేసీ వేణుగోపాల్ సమక్షంలో జిల్లా కలెక్టర్​కు ప్రమాణ పత్రం సమర్పించారు రాహుల్​. ఈ వేడుకకు కాంగ్రెస్​ కార్యకర్తలు, అభిమానులు భారీగా తరలివచ్చారు. జిల్లా ప్రధాన కార్యాలయం వద్ద సందడి వాతావరణం నెలకొంది.

దక్షిణాది నుంచి రాహుల్​గాంధీ పోటీ చేయడం ఇదే తొలిసారి. వయనాడ్​ లోక్​సభ స్థానంతోపాటు ఉత్తర్​ప్రదేశ్​లోని అమేఠీలోనూ కాంగ్రెస్​ అధ్యక్షుడు బరిలో ఉన్నారు.​ దక్షిణాది నుంచి రాహుల్​ పోటీ చేయాలని కేరళతో పాటు, కర్ణాటక, తమిళనాడు నుంచి వినతులు అందాయి. కానీ కాంగ్రెస్​ అధ్యక్షుడు కేరళలోని వయనాడ్​ వైపే మొగ్గుచూపారు.

భారీ బందోబస్తు నడుమ రాహుల్​ వయనాడ్​లో నామినేషన్​ వేశారు.