2019లో ఇదే రోజున పుల్వామాలో జరిగిన ఉగ్రదాడిలో 40 మంది జవాన్లు అమరులయ్యారు. ఏడాది తర్వాత ఈ ఘటనపై భాజపా లక్ష్యంగా తీవ్ర విమర్శలు చేశారు కాంగ్రెస్ అగ్రనేత రాహుల్ గాంధీ. పుల్వామా ఘటనతో ఎవరికి ప్రయోజనం చేకూరిందని ట్విట్టర్ వేదికగా కేంద్రానికి మూడు ప్రశ్నలు సందించారు.
"పుల్వామా దాడిలో ప్రాణాలు కోల్పోయిన 40 మంది సీఆర్పీఎఫ్‌ అమర జవాన్లను మనం ఈ రోజు స్మరించుకుంటున్నాం. ఈ సందర్భంగా కేంద్రాన్ని మనం అడగాల్సినవి ఇవే.. 1. ఈ దాడితో ఎవరికి ఎక్కువ ప్రయోజనం చేకూరింది? 2. దాడిపై చేపట్టిన దర్యాప్తులో ఏం తేలింది? 3. దాడికి కారణమైన భద్రతా లోపాలకు భాజపా ప్రభుత్వంలో ఎవరు బాధ్యత వహిస్తున్నారు?"
-రాహుల్ గాంధీ ట్వీట్.
రాహుల్ వ్యాఖ్యలపై భాజపా తీవ్రంగా స్పందించింది. దేశం కోసం ప్రాణాలు అర్పించిన అమరుల త్యాగాలతో రాజకీయాలేంటని మండిపడింది.
"రాహుల్ వ్యాఖ్యలను చూస్తుంటే ఆయన మానసిక రుగ్మతతో బాధపడుతున్నారని అనిపిస్తోంది. ఇలాంటి భాష మాట్లాడే రాజకీయ నాయకులను ప్రజలు రాబందులంటారు. అమరుల త్యాగాలనూ రాజకీయం చేస్తున్నారు. దేశంకోసం ప్రాణాలర్పించిన వారి వల్ల దేశానికే ప్రయోజనం కలుగుతుంది. ఈ విషయాన్ని రాజకీయ కోణంలో చూస్తే.. మా వద్దా రెండు ప్రశ్నలున్నాయి. ఇందిరా గాంధీ, రాజీవ్ గాంధీ హత్యల వల్ల ఎవరు ప్రయోజనం పొందారో చెప్పాలి. ఇలాంటి వ్యాఖలు చేసే వ్యక్తులు ఉండటం మన దౌర్భాగ్యం.
-మీనాక్షీ లేఖి, దిల్లీ భాజపా ఎంపీ.
పాకిస్థానీ భాష...
రాహుల్ వ్యాఖ్యలపై భాజపా అధికార ప్రతినిధి జీవీఎల్ నరసింహారావు తీవ్ర స్థాయిలో ధ్వజమెత్తారు. పాకిస్థాన్ ఉగ్రవాద సంస్థలకు వత్తాసు పలికేలా రాహుల్ భాష ఉందని ట్వీట్ చేశారు. పుల్వామా దాడికి బాధ్యులైన పాకిస్థాన్ను ఆయన ఎప్పుడూ ప్రశ్నించరని ఆరోపించారు.
ఇదీ చూడండి: కశ్మీర్లో పాక్ సైన్యం కాల్పులు.. స్థానికుడు మృతి
