యూపీలో ప్రచార జోరు పెంచిన ప్రియాంక

ఉత్తర​ప్రదేశ్​లో మరోమారు సుడిగాలి పర్యటన చేయనున్నారు కాంగ్రెస్​ ప్రధాన కార్యదర్శి ప్రియాంక గాంధీ. రెండు రోజుల పాటు అమేఠీ, రాయబరేలీలో పర్యటించనున్నారు. శుక్రవారం అయోధ్యలో ప్రచారం చేయనున్నారు.

వరుస పర్యటనలతో ఉత్తర​ప్రదేశ్​ని చుట్టేస్తున్నారు కాంగ్రెస్​ పార్టీ ప్రధాన కార్యదర్శి ప్రియాంక గాంధీ వాద్రా. బుధవారం, గురువారం ఆమె కాంగ్రెస్​ పార్టీ కంచు కోటలైన అమేఠీ, రాయబరేలీలో ప్రచారం నిర్వహించనున్నారు. శుక్రవారం అయోధ్యలో పర్యటిస్తారు.

శుక్రవారం ఫజియాబాద్​- అయోధ్య వెంబడి 50 కిలోమీటర్ల మేర ప్రియాంక రోడ్​షో నిర్వహణకు ప్రణాళికలు రచించింది కాంగ్రెస్​ పార్టీ. ఈ సమయంలో రెండు బహిరంగ సభల్లో ప్రియాంక ప్రసంగించే అవకాశముందని కాంగ్రెస్ ప్రచార​ కమిటీ కార్యదర్శి రాజేంద్ర ప్రతాప్​ సింగ్​ తెలిపారు.

50 కిలోమీటర్ల పాటు సాగే ఈ రోడ్​షోలో ప్రియాంక సూమారు 30 చోట్ల ఆగి ప్రజలతో సంభాషించనున్నారని కాంగ్రెస్​ పార్టీ నాయకులు వెల్లడించారు.

రామజన్మ భూమి-బాబ్రీ మసీదు స్థలాన్ని ప్రియాంక సందర్శిస్తారనే విషయంపై కాంగ్రెస్​ పార్టీ ఎలాంటి స్పష్టతను ఇవ్వలేదు. అలాగే ఆమె సందర్శించే దేవాలయాలపైనా పార్టీ ప్రకటన చేయలేదు.

నేడు అమేఠీలో ప్రియాంక బూత్​ స్థాయి నాయకులతో భేటీ కానున్నారు. తర్వాత అక్కడి నుంచి సోనియా గాంధీ పోటీ చేస్తున్న రాయబరేలీ వెళ్తారు.