దేశవ్యాప్తంగా అలజడి సృష్టిస్తున్న పౌరసత్వ చట్టానికి వ్యతిరేకంగా బంగాల్లోని పలు ప్రాంతాల్లో వరుసగా ఐదో రోజూ నిరసనలు కొనసాగుతున్నాయి. ఉత్తర 24 పరగణాల జిల్లాలోని హసీర్హాట్లో పౌర చట్టానికి వ్యతిరేకంగా ప్రదర్శన చేశారు నిరసనకారులు. ఆందోళనల కారణంగా ఉత్తర బంగాల్ రైల్వే పరిధిలోని పలు రైళ్ల రాకపోకలకు అంతరాయం ఏర్పడింది.
బంగాల్ పోలీసులు రాష్ట్ర వ్యాప్తంగా నిరంతర నిఘా ఏర్పాటుచేశారు. ఇప్పటివరకు 354 మంది ఆందోళనకారులను అరెస్టు చేశారు.
మమత ర్యాలీ..
పౌరసత్వ చట్టానికి వ్యతిరేకంగా జాదవ్పుర్ 8బి బస్టాండ్ నుంచి భవానిపుర్ వరకు ర్యాలీ నిర్వహించనున్నారు బంగాల్ సీఎం, తృణమూల్ అధినేత్రి మమతా బెనర్జీ. విధ్వంస చర్యలకు పాల్పడొద్దని నిరసనకారులకు సూచించారు. నిన్న కూడా కోల్కతాలో భారీ ర్యాలీ నిర్వహించారు మమత.
గువాహటిలో కర్ఫ్యూ ఎత్తివేత..
డిసెంబరు 11 తర్వాత తొలిసారి అసోం గువాహటిలో కర్ఫ్యూ ఎత్తివేశారు. సాధారణ పరిస్థితులు నెలకొన్నందు వల్లే ఈ నిర్ణయం తీసుకున్నట్లు అధికారులు తెలిపారు. అంతర్జాలంపై ఆంక్షల విషయంలో మాత్రం స్పష్టత ఇవ్వలేదు.
కర్ఫ్యూ ఎత్తివేతతో వాహనాలు రోడ్డెక్కాయి. దుకాణాలు తెరుచుకున్నాయి.
షిల్లాంగ్లో కర్ఫ్యూ సడలింపు..
మేఘాలయా షిల్లాంగ్లో ఈరోజు రాత్రి 7గంటల వరకు కర్ఫ్యూ సడలిస్తున్నట్లు అధికారులు వెల్లడించారు. అంతర్జాల సేవలపై మాత్రం నిషేధం కొనసాగుతుందని స్పష్టం చేశారు.
కర్ఫ్యూ ఎత్తివేతతో బ్యాంకులు, మార్కెట్లు తెరుచుకున్నాయి. సాధారణ పరిస్థితులు నెలకొన్నాయి.
ఇదీ చూడండి: దిల్లీ 'జామియా' ఘటనలో 10 మంది అరెస్టు
