కేంద్రం తీసుకొచ్చిన సాగు చట్టాలపై తీవ్ర స్థాయిలో వ్యతిరేకత ఎదురవుతున్న తరుణంలో.. ఉత్తర్ప్రదేశ్లో 'జై జవాన్.. జై కిసాన్' ఉద్యమాన్ని కాంగ్రెస్ పార్టీ బుధవారం ప్రారంభించనుంది. ఇందులో ఆ పార్టీ ప్రధాన కార్యదర్శి ప్రియాంక గాంధీ వాద్రా కీలకంగా వ్యవహరించనున్నారు. సహరన్పుర్ వేదికగా జరగనున్న కిసాన్ పంచాయత్లో ఆమె పాల్గొంటారు. ఈ విషయాన్ని యూపీ కాంగ్రెస్ మీడియా కన్వీనర్ లలన్ కుమార్ వెల్లడించారు.
రాష్ట్రంలో 10రోజుల పాటు ఈ 'జై జవాన్.. జై కిసాన్' ఉద్యమం జరగనుంది. మొత్తం 27 జిల్లాలో జరిగే ఈ కార్యక్రమంలో వివిధ పార్టీలకు చెందిన సీనియర్ నేతలు కూడా పాల్గొననున్నట్టు లలన్ కుమార్ తెలిపారు.
సాగు చట్టాలకు వ్యతిరేకంగా ఇప్పటికే రైతులకు మద్దతుగా నిలిచిన కాంగ్రెస్.. ఈ 10రోజుల కార్యక్రమంతో వచ్చే ఏడాది జరగనున్న అసెంబ్లీ ఎన్నికలపై పట్టు సాధించాలని భావిస్తోంది.
ఇదీ చదవండి : సాగు చట్టాలపై ఐటీసీ, అమూల్తో నిపుణుల బృందం చర్చ
